Qasym-Jomart Toqaev: Separatızmniń kez kelgen belgilerine qarsy turýymyz kerek

ASTANA. QazAqparat – Prezıdent Qasym-Jomart Toqaev Qazaqstan halqy Assambleıasynyń HHHІІ sessııasynyń otyrysynda separatızm belgilerine Qazaqstan halqy jurt bolyp qarsy turý kerektigin aıtty, dep habarlaıdy QazAqparat tilshisi.

«Bizdegi birlik pen kelisimdi buzýǵa baǵyttalǵan kez kelgen arandatýshylyqtyń jolyn kesý qajet. Biz qoǵamdyq óriste ártúrli jalǵan nemese feık, destrýktıvti jarııalanymdardyń aıtarlyqtaı kóbeıgenin kórip otyrmyz.

Ondaı jarııalanymdardyń basym kópshiliginde avtorlardyń Qazaqstanmen esh qatysy joq. Shetelden áreket ete otyryp, qoǵam arasynda janjal tuqymyn sebýge tyrysady. Olardyń rıtorıkasy men áreketteri senimsizdik atmosferasyn qalyptastyrýǵa, adamdar arasyndaǵy alaýyzdyqty qozdyrýǵa, memlekettik qaýipsizdikti buzýǵa baǵyttalǵan», - dedi Prezıdent.

Qasym-Jomart Toqaevtyń aıtýynsha, teris pıǵyldaǵylardyń talpynysymen turmystyq nemese qylmystyq sıpattaǵy kez kelgen kıkiljiń etnosaralyq deńgeıge shyǵyp, aýyr zardaptarǵa ákelýi múmkin.

«Sondyqtan biz jaýapty azamattar retinde rakdıkalızmniń, ekstremızm men separatızmniń kez kelgen belgilerine qarsy turyp, bul máselede baıypty ári qatań, túptep kelgende ádiletti bolýymyz kerek», - dedi Memleket basshysy.

Aıta keteıik, Prezıdent Qasym-Jomart Toqaevtyń qatysýymen Qazaqstan halqy Assambleıasynyń HHHІІ sessııasy ótip jatyr.