Qasym-Jomart Toqaev saıası reformalardy ne úshin ótkizý qajettigin túsindirdi

NUR-SULTAN. QazAqparat – QR Prezıdenti Qasym-Jomart Toqaev saıası reformalar júrgizý qajettigi týraly aıtty, dep habarlaıdy QazAqparat tilshisi.

«Men bastapqyda «aldymen ekonomıka, sodan keıin saıasat» formýlasy óz resýrsyn sarqyp bitti dep oıladym. Biraq bul 90-jyldardyń basynda óte paıdaly boldy. Adamdardyń azamattyq belsendiligin kóterý úshin saıası ózgerister jasaýymyz keregin túsindim jáne qoǵam da osyny qajet etip otyrǵan edi. Іs júzinde saıası reformalardy bastadym. 2019 jyly beıbit mıtıngiler týraly zańdy ázirleýge kiristik, sodan keıin parlamenttik reforma bastaldy jáne áıelderge qatysty 30% kvota engizildi», - dedi Qasym-Jomart Toqaev reseılik jýrnalıst Andreı Kondrashovqa bergen suhbatynda.

QR Prezıdenti elimizde ótken referendýmnyń baǵytyn da túsindirdi.

«Referendýmǵa kelsek, bul saıası qurylymdy qaıta qurý maqsatynda men bastaǵan naýqandy jalǵastyrýmen baılanysty. Rasynda da, biz sýperprezıdenttik júıeden ketýimiz kerek, ol óziniń tıimdi bolǵanyn kórsetti. Qazaqstan 90-jyldardyń aıaǵy men 2000-jyldardyń basynda óz damýynda úlken serpilis jasady. Biraq ómir bir orynda turmaıdy, qaıta qurýlar men reformalar qajet. Sondyqtan yqpaldy parlament, atqarýshy bılik óz rólin atqaratyn jáne Parlament pen óz halqy aldynda tolyq esep beretin órkenıetti prezıdenttik júıege kóshý qajet dep uıǵardym. Parlamentke kelsek, tómengi palataǵa kelesi saılaý múldem jańa erejede ótedi – 70% degenimiz proportsıonaldy júıe, ıaǵnı partııalyq tizimder, al 30% - birmandatty okrýgter boıynsha majorıtarlyq júıe bolady. Árıne, Parlamenttiń qyzmetine qatysty keıbir zańdardy ózgertý qajet bolady. Bul úlken jumys, ony jyl sońyna deıin sheshe alamyz dep oılaımyn», - dedi Qasym-Jomart Toqaev.