Qasym-Jomart Toqaev prezıdenttiginiń bir jyly: Qazaqstan údemeli reformalar jolynda

AMMAN. QazAqparat - Iordanııanyń «Petra» memlekettik aqparat agenttiginiń saıası sholýshysy, Iordanııa Energetıka jáne mıneraldy resýrstar mınıstrliginiń spıkeri Mashhýr Ábý Eıd Qazaqstan Prezıdenti Qasym-Jomart Toqaev basshylyǵynyń bir jyldyq qorytyndysy týraly pikir bildirdi, dep habarlaıdy QazAqparat tilshisi.

Mashhýr Ábý Eıd Qazaqstanǵa birneshe ret saparlaǵan, 2015 jyly kezekten tys prezıdent saılaýyn jazýǵa jáne EHRO-2017 halyqaralyq kórmesine barǵan.

Onyń baǵalaýynsha, Qazaqstan Prezıdenti Qazaqstandy alǵa damytý úshin ne isteý qajettigin biledi. Ásirese, Prezıdent Q. Toqaev qurǵan Ulttyq qoǵamdyq senim keńesi az ýaqytta Úkimet pen halyq arasyndaǵy dıalogty jaqsarta aldy.

«Ulttyq qoǵamdyq senim keńesi platformasynda úzdik ıdeıalar generatsııasy iske qosyldy. Onyń ishindegi eń qajettileri júzege asyrylyp jatyr. Tanymal saıasatkerler, shyǵarmashylyq zııatkerleri, qoǵam qaıratkerleri jáne ekonomıster eldiń qoǵamdyq-saıası ómirine belsendi tartylǵan», - dep pikir bildirdi M. Ábý Eıd.

Ulttyq keńes usynystaryn eskere otyryp, Prezıdent Q.Toqaev saıası reformalar kesheni aıasynda birqatar zańnamalyq aktilerge qol qoıdy. Bul aktiler «Halyq únine qulaq asatyn memleket» tujyrymdamasy men azamattyq qoǵamnyń rólin arttyrýdaǵy mańyzdy qadam sanalady.

Spıkerdiń aıtýynsha, Qazaqstandaǵy jańa quqyqtyq normalar pikirler plıýralızmi, balama kózqarastar, syndarly ustanym jáne saılaýshy aldyndaǵy jaýapkershilik syndy qundylyqtardy nyǵaıta túsedi.

Sonymen birge, zańnamaǵa engizilgen túzetýler partııalardyń eldegi saıası protsesterge yqpalyn arttyrýǵa yqpal etedi. Olar jańa partııa qurýǵa jáne eldegi saıası partııalar ómirin jandandyrýǵa septigin tıgizedi.

Túrli pikirler men usynystardy erkin talqylaý úkimet sheshimderin ázirleýge jáne qabyldaýǵa oń áser etedi.