Qasym-Jomart Toqaev prezıdenttigine bir jyl: Armenııa sarapshylarynyń pikiri

EREVAN. QazAqparat – Armenııa prezıdentiniń keńesshisi, Halyqaralyq adamı damý ortalyǵynyń dırektory Tevan Pogosıan jáne saıası sholýshy Aık Halatıan Qasym-Jomart Toqaevtyń Qazaqstan Prezıdenti qyzmetindegi negizgi qadamdary jóninde pikir bildirdi, dep habarlaıdy QazAqparat tilshisi.

Tevan Pogosıannyń pikirinshe, Q. Toqaevtyń bir jyldyq qyzmetinde Qazaqstan óziniń evolıýtsııalyq bılik sabaqtastyǵy modelin kórsete aldy. Bul ýaqytta Memleket basshysy ózin kelissóz júrgize alatyn, barlyǵyn tyńdap, sheshim qabyldaı alatyn adam retinde kórsetti.

Tevan Pogosıan bir jylda syrtqy saıasattyń jańa tujyrymdamasy qabyldanǵanyn, onda 2030 jylǵa deıingi basymdyqtar kórsetilgenin atap ótti.

«Jańa tujyrymdamada syrtqy saıasattyń ekonomıkalyq quraýshysyn kúsheıtýge kóńil bólingen, onyń basty maqsaty - memleket múddesin qorǵaý. Bul múddelerdiń arasynda qaýipsizdik, energetıka, ekonomıka komponentteri bar. Árıne, Qazaqstan jańa tabys kózderi men ekonomıkalyq múmkindikterdi izdeıdi. Bul - turaqty protsess, ásirese koronavırýs pandemııasy kezinde barlyq elde azyq-túlik qaýipsizdigi máselesi ózekti bola tústi. Jańa jahandyq geoekonomıkalyq jaǵdaıda Qazaqstan jańa ekonomıkalyq múmkindikter men tabys kózderin nyq senimmen izdestirýde», - dedi T. Pogosıan.

Óz kezeginde armıan saıası sholýshysy Aık Halatıan Qasym-Jomart Toqaevtyń bir jylda aıtýly tabystarǵa qol jetkizgenin atap ótti.

«Ótken jyldaǵy basty jetistikterdiń biri retinde eldegi saıası jáne ekonomıkalyq turaqtylyqty saqtaı otyryp júrgizilgen bılik tranzıtin aıtýǵa bolady. Qazaqstannyń ishki erekshelikterin eskersek, bul - óte mańyzdy. Eldiń ornalasqan aýmaǵy da kúrdeli ári problemalyq aımaq sanalady, onyń ústine Ortalyq Azııaǵa yqpal júrgizýde jahandyq oıynshylar kúresi júrip jatyr. Alaıda, osyǵan qaramastan, Qazaqstan Qasym-Jomart Toqaevtyń jetekshiligimen Reseı, AQSh, Qytaı, EO jáne aımaqtaǵy kórshi eldermen qarym-qatynasty joǵary deńgeıde saqtap, pragmatıkalyq jáne kópvektorly saıasatyn jalǵastyryp keledi», - dedi Aık Halatıan.

Sonymen birge, Aık Halatıan Qazaqstannyń áleýmettik máselelerge jáne qoǵammen dıalogqa basa kóńil bólip otyrǵanyn aıtty. Bul rette saıası sholýshy «Halyq únine qulaq asatyn memleket» tujyrymdamasyn, onyń aıasynda Ulttyq qoǵamdyq senim keńesi men Prezıdenttiń vırtýaldy qabyldaý bólimi qurylǵanyn eske saldy.

«Oǵan qosa, Qasym-Jomart Toqaevtyń jetekshiligindegi qazaqstandyq bıliktiń koronavırýs ınfektsııasynyń jańa túrimen tıimdi kúres júrgizgenin aıtý kerek. Infektsııamen tıimdi kúres júrgizý - memlekettik apparattyń joǵary atqarý tártibiniń jaqsy kórsetkishi dep esepteımin», - dedi A.Halatıan.

Foto: kantiana.ru