Qasym-Jomart Toqaev Premer-Mınıstr Keńsesin transformatsııalaýdy usyndy

ASTANA. QazAqparat – Memlekettik organdardyń basshylary jekelegen máseleler boıynsha óz betinshe sheshim qabyldaýdan áli qorqady. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Vedomstvoaralyq úılestirý men salaaralyq máselelerdi sheshýdegi rólin arttyra otyryp, Premer-Mınıstr Keńsesin Úkimettiń jınaqy apparatyna keshendi transformatsııalaý júrgizilýi tıis. Qabyldanǵan sheshimderdi sapasyz oryndaý máseleleri mınıstrler men vedomstvolar basshylarynyń ókilettikterine negizdeledi. Memlekettik organdardyń basshylary jekelegen máseleler boıynsha óz betinshe sheshim qabyldaýdan áli qorqady», - dedi Memleket basshysy.

Qasym-Jomart Toqaevtyń atap ótýinshe, memlekettik organdar ártúrli dálelderdi alǵa tartyp, Prezıdenttiń nemese Prezıdent Ákimshiligi basshysynyń maquldaýyn alýǵa tyrysatyndyǵyn basa aıtty.

«Keıde Úkimet múshelerine jazbasha tapsyrma berýge týra keledi. Áıtpese tapsyrmanyń oryndalmaý, jobanyń oryndalý merziminiń úzilý qaýpi bar. Bıýrokratııasyzdandyrý týraly Jarlyq aıasynda biz Úkimet pen ýákiletti memlekettik organdardyń quzyretine jatatyn aǵymdaǵy máseleler boıynsha qujattardy Ákimshilikke engizýge tyıym saldyq. Alaıda bul tájirıbe áli joıylǵan joq», - dedi Prezıdent.