Qasym-Jomart Toqaev: Nurǵısa Tilendıevtiń 100 jyldyǵyn keń kólemde atap ótý kerek
15:32, 01 Sáýir 2022
NUR-SULTAN. QazAqparat - Prezıdent «Otyrar sazy» orkestriniń jetekshisi Dınara Tilendıevany qabyldady, dep habarlaıdy QazAqparat Aqordanyń resmı saıtyna silteme jasap.
Kezdesý barysynda qazaq mádenıetin damytý máseleleri talqylandy.
Dınara Tilendıeva Qazaqstan Prezıdentine «Otyrar sazy» memlekettik akademııalyq folklorlyq-etnografııalyq orkestriniń qyzmeti men aldaǵy jospary týraly málimet berdi.
Atap aıtqanda, ol birqatar perspektıvti jobany júzege asyrý jaıynda, onyń ishinde ıtalııalyq tenor Andrea Bochellıdiń repertýaryndaǵy jáne basqa da qazaqtyń halyq aspaptarynda oınaıtyn belgili mýzykanttardyń tanymal shyǵarmalaryn oryndaý jóninde baıandady.
2025 jyly asa kórnekti kompozıtor Nurǵısa Tilendıevtiń týǵanyna 100 jyl tolady. Kezdesýde osy mereıtoıǵa arnaıy nazar aýdaryldy.
Qasym-Jomart Toqaev atalǵan mańyzdy oqıǵany keń kólemde atap ótý qajet ekenin aıtty.