Qasym-Jomart Toqaev: Naǵyz ıslamshyldyq qara kıim, kelte shalbar, uzyn saqal emes

ASTANA. QazAqparat - QR Parlamenti Senatynyń Tóraǵasy Qasym-Jomart Toqaev Elbasynyń dinge qatysty aıtqan pikirin qoldap, Tvıtterdegi paraqshasynda jazba qaldyrdy.

«Naǵyz ıslamshyldyq bul qara kıim, kelte shalbar, uzyn saqal emes, bul ımandylyq, bilimdilik, eńbekqorlyq, keńshilik. Elbasymyz óte durys aıtty», - dep jazady Senat Tóraǵasy.

Eske sala keteıik, keshe QR Prezıdenti Nursultan Nazarbaev Qazaqstan musylmandary dinı basqarmasynyń ókilderimen kezdesken bolatyn. Onda Elbasy Qazaqstan halqynyń ómirinde dinniń erekshe ról atqaratynyn atap ótip, jas urpaqtyń dinı saýatsyzdyǵyna aıryqsha nazar aýdardy.

«Dinı saýatsyzdyǵynyń nátıjesinde jastarymyz saqal qoıyp, shalbarynyń balaqtaryn qysqartyp tastaıdy. Qara kóılek kıip, beti-aýzyn tumshalaǵan qyzdarymyzdyń qatary kóbeıdi. Bul bizdiń dástúrimizge de, halqymyzǵa da jat. Buǵan zańnamalyq deńgeıde tyıym salý máselesin pysyqtaý kerek. Qazaq qara kıimdi qaraly kezde ǵana kıedi», - dedi Memleket basshysy.

Nursultan Nazarbaev qazaq mádenıetiniń tarıhyna, qazaq áıelderiniń dástúrli kıimine toqtalyp, qara kıim men din arasynda eshqandaı baılanys joq ekenin aıtty.