Qasym-Jomart Toqaev Lısakov qalasynyń jylý elektr ortalyǵyna bardy

LISAKOV. QazAqparat – Prezıdent Qasym-Jomart Toqaev Qostanaı oblysyna jumys sapary barysynda Lısakov qalasynyń jylý elektr ortalyǵyna bardy, dep habarlaıdy QazAqparat Aqordaǵa silteme jasap.

Memleket basshysyna jylý ortalyǵynyń jabdyqtalýy men qalanyń kommýnaldyq ınfraqurylymynyń qazirgi jaǵdaıy jóninde málimet berildi.

«Lısakovskgorkommýnenergo» kásipornynyń menshiginde Lısakov qalasyn jylýmen qamtamasyz etetin ortalyq qazandyq jáne qalaǵa jaqyn Oktıabr kentinde ornalasqan eki blokty-modýldy qazandyq bar.

Lısakov qalasynyń ákimi Abaı Ibraevtyń aıtýynsha, jylý ortalyǵy 1968-78 jyldary paıdalanýǵa berilgen. Ortalyqtaǵy sý jylytý qazandyqtary sońǵy ret 2020 jyly kúrdeli jóndeýden ótken. Olardyń ortasha tozý deńgeıi 51 paıyzǵa jetken. Sondyqtan, taıaý jyldary sý jylytý qazandyqtaryna kúrdeli jóndeý júrgizý josparlanyp otyr.

Al, jalpy uzyndyǵy 112 kılometr jylý jelisiniń tozý deńgeıi – 41%. 2012 jyldan beri «Shaǵyn jáne monoqalalardy damytý» baǵdarlamasy aıasynda jylý jelileriniń ınfraqurylymyna qatysty 8 joba júzege asqan. Sonyń nátıjesinde tozý deńgeıi 7 paıyzǵa qysqaryp, 41 paıyzǵa deıin tómendegen. Sońǵy bes jylda jylý qubyrlaryndaǵy apattar sany eki ese qysqarǵan. Qala ákiminiń aıtýynsha, aldaǵy ýaqytta jylý jelisi men qalanyń basqa da kommýnaldyq ınfraqurylymyn jańǵyrtý jumystary jalǵasyn tabady.

Memleket basshysy turǵyn úı-kommýnaldyq sharýashylyq salasynyń strategııalyq mańyzy zor ekenine nazar aýdaryp, qala men oblys ákimderine jylytý maýsymyna daıyndyq máselesimen júıeli túrde aınalysýdy tapsyrdy.

Foto: akorda.kz