Qasym-Jomart Toqaev Qytaıdyń ınternet saýda alpaýyttaryna taýaryn Qazaqstan qoımalarynda saqtaýdy usyndy
Prezıdent elektrondy saýda salasynda ózara alys-beristi arttyrý úshin qosymsha múmkindikter bar ekenine nazar aýdardy.
«Onlaın saýdany damytý asa mańyzdy. Buǵan jappaı shekteýler kezinde kózimiz anyq jetti. Qytaıdyń «Alibaba Group», «JD.COM» sııaqty ınternet alpaýyttarynyń osy saladaǵy tájirıbesi men áleýeti orasan zor. Ortalyq Azııa elderiniń naryqtaǵy básekede óz artyqshylyqtary bar. Osy oraıda, Qazaqstan Qytaıdyń iri elektrondy saýda alańdaryn keńinen paıdalanýdy usynady. Bul qadam ónimderimizdi naryqqa birlese shyǵarý úshin asa mańyzdy. JD.COM platformasynda Qazaqstannyń ulttyq pavılony ashylady. Bolashaqta ózara saýda-sattyǵymyz arta túsetini anyq. Biz osyny eskere otyryp, jańa keden qoımalaryn ashýǵa belsene kiristik. Osy oraıda seriktesterimizge taýaryn bizdiń qoımalarymyzda saqtaýdy usynamyz. Munyń logıstıka turǵysynan alǵanda óte qolaıly ekenin aıta ketken jón. Sonda Ortalyq Azııa men Qytaıdyń arasynda eki baǵytta da taýar tasymaldaý merzimin azaıtýǵa múmkindik týady», – dedi Memleket basshysy.
Buǵan deıin Memleket basshysynyń qazaq-qytaı ınvestıtsııalyq dóńgelek ústeline qatysqanyn jazǵan bolatynbyz.
Prezıdenttiń QHR-ǵa sapary aıasynda quny 22 mlrd dollar bolatyn 47 qujatqa qol qoıyldy