Qasym-Jomart Toqaev: Qutqarý qyzmeti – óte mańyzdy sala

KÓKShETAÝ. QazAqparat – Memleket basshysy M. Ǵabdýllın atyndaǵy Azamattyq qorǵaý akademııasyna bardy, dep habarlaıdy QazAqparat Aqordaǵa silteme jasap.

«Halqymyzdyń amandyǵyn jáne qaýipsizdigin saqtaý – basty mindet ári qasterli paryz. Bul – eń aldymen, qutqarýshy mamandarǵa júkteletin zor senim, úlken jaýapkershilik.

Qutqarý qyzmeti – óte mańyzdy sala. Sońǵy kezde jer júzinde tótenshe oqıǵalar jıilep barady. Jurtymyz mundaı qaýip-qaterge árdaıym daıyn bolýy kerek. Sondyqtan, osy salada qyzmet etip júrgen mamandardyń eńbegi elimiz úshin óte mańyzdy», - dedi Qasym-Jomart Toqaev Akademııa kýrsanttary aldynda sóılegen sózinde.

Elimizdegi kásibı qutqarýshylar daıarlaıtyn birden-bir oqý ornyn shırek ǵasyr ishinde 6 myńǵa jýyq maman bitirip shyqqan. Akademııa túlekteri barlyq oblysta eńbek etip júr. Olar Otan aldyndaǵy boryshyn adal atqaryp keledi. Prezıdent kúzde elimizdiń birneshe aımaǵy alapat órtten zardap shekkenine toqtalyp, syn saǵatta turǵyndarǵa aldymen qutqarýshylar kómekke jetkenin atap ótti.

«Qutqarýshy bolý – qıyn ári qaterli jumys. Shyn máninde, bul – naǵyz erjúrek azamattardyń kásibi. Tótenshe jaǵdaı mamandary jumys barysynda talaı ret erlik kórsetti. Basqa adamdardyń ómirine arasha túsip, qaza tapqan qutqarýshylar az emes. Olardyń qatarynda osy Akademııanyń túlegi Asqar Zabıkýlın de bar. «Er esimi – el esinde». Batyrlardyń erligi eshqashan umytylmaýǵa tıis», - dedi Qasym-Jomart Toqaev.

Foto: t.me/aqorda_resmi