Qasym-Jomart Toqaev ınvestıtsııaǵa jaýapty vedomstvoǵa tapsyrma berdi

NUR-SULTAN. QazAqparat – Memleketter arasynda shetel ınvestıtsııasyna talas kúsheıdi. Bul týraly QR Syrtqy ister mınıstrliginiń keńeıtilgen alqa májilisinde QR Prezıdenti Qasym-Jomart Toqaev málim etti, dep habarlaıdy QazAqparat tilshisi.

Ekonomıkalyq dıplomatııany qaıta jandyrý máselesine toqtalǵan Prezıdent: «Álemdik saıasatta klımat pen tehnologııa máseleleri aıryqsha ózekti. Pandemııadan keıin ekonomıkany qalpyna keltirý úshin memleketter arasynda shetel ınvestıtsııasyna talas kúsheıdi. Syrtqy ister mınıstrligi – ınvestıtsııa tartý jónindegi memlekettik saıasatty iske asyratyn ýákiletti organ. Biz mınıstrlikke osyndaı erekshe mártebe berdik. Sondyqtan, bul múmkindikti tolyqqandy paıdalaný qajet», - dedi.

Osy oraıda Memleket basshysy Qazaqstan eksportyn ilgeriletýge barynsha qolǵabys etý taǵy bir mańyzdy mindet ekenin atap ótti.

«Elimiz Shyǵys pen Batysty, Soltústik pen Ońtústikti jalǵaıtyn kúre joldardyń boıyndaǵy tranzıttik-logıstıkalyq habqa aınalýǵa tıis. «Nurly Jol» baǵdarlamasy jáne kórshi elderdiń ınfraqurylymdyq bastamalary osyǵan negiz bolady. Bul jumysta mınıstrlikke aıryqsha mindet júkteledi», - dedi Q. Toqaev.