Qasym-Jomart Toqaev Igor Fınogenovti qabyldady

NUR-SULTAN. QazAqparat - Qazaqstan Prezıdenti Qasym-Jomart Toqaev «Polımetall» kompanııasy dırektorlar keńesiniń múshesi Igor Fınogenovti qabyldady, dep habarlaıdy QazAqparat Aqordanyń baspasóz qyzmetine silteme jasap.

Memleket basshysyna «Polımetall» kásipornynyń Qazaqstan men Reseı naryǵynda júzege asyrylyp jatqan iri jobalary týraly málimet berildi.

Qazaqstan Prezıdenti «Polımetall» kásipornynyń «Astana» halyqaralyq qarjy ortalyǵynyń bırjasyna enýimen quttyqtap, kompanııanyń bizdiń eldegi jumysyna toqtaldy.

– «Polımetall» «Astana» halyqaralyq qarjy ortalyǵynyń bırjasynda ornalasqan alǵashqy sheteldik kompanııa atanýymen quttyqtaımyn jáne rızashylyǵymdy bildiremin. Sizder Shyǵys Qazaqstan oblysyndaǵy Baqyrshyq ken ornynda «Qyzyl» jobasyn tabysty aıaqtadyńyzdar. Qostanaı oblysyndaǵy altyn ken ornynda da jobalar júzege asyryp jatyrsyzdar, – dedi Qasym-Jomart Toqaev.

Igor Fınogenov «Astana» HQO sheteldik kompanııalarǵa Qazaqstanda jumys isteýge úlken ınvestıtsııalyq múmkindikter jasap otyrǵanyn atap ótti.

– «Astana» halyqaralyq qarjy ortalyǵynyń bırjasyna enýimizdi úlken jetistik dep sanaımyz. Óıtkeni, bul Qazaqstanda qarjylyq jobalardy júzege asyrýǵa baǵyttalǵan alǵashqy qadamdarymyz. Biz geologııalyq barlaý jumystaryna ınvestıtsııa salýǵa múddelimiz, al bırja bul úshin jaqsy múmkindik, – dedi Igor Fınogenov.

Kezdesý sońynda taraptar yntymaqtastyqtyń aldaǵy ýaqytta da arta beretinine senim bildirdi.