Qasym-Jomart Toqaev eki avtojoldyń qurylysyna qatysty tapsyrma berdi

EKІBASTUZ. QazAqparat – Memleket basshysy Qasym-Jomart Toqaev eki avtojoldyń qurylysyna qatysty tapsyrma berdi, dep habarlaıdy QazAqparat tilshisi.

«2024 jyly Jezqazǵan-Qyzylorda avtomobıl jolynyń qurylysy aıaqtalýy tıis. Bul Jezqazǵan men Sátbaev qalalarynyń saýda-kólik baılanysyn kúsheıtýge, sonymen qatar júk tranzıtin arttyrýǵa múmkindik beredi», - dedi Qasym-Jomart Toqaev Ekibastuzda ótip jatqan monoqalalardy damytý máselelerine arnalǵan jınalysta.

Aqordanyń Twitter-degi málimetine sáıkes, sondaı-aq Memleket basshysy Nur-Sultan-Almaty jolyn jańǵyrtýdy 2023 jyly aıaqtaýdy tapsyrdy.

«Shalǵaıdaǵy iri monoqalardyń elimizdiń ózge óńirlermen strategııalyq kólik baılanysyn qamtamasyz etý qajet. Men Nur-Sultan-Almaty jolyn jańǵyrtýdy 2023 jyly aıaqtaý tapsyrmasyn berdim. Ol Balqash qalasynyń áleýetin aıtarlyqtaı arttyratyn bolady», - dedi QR Prezıdenti.

Buǵan deıin habarlaǵanymyzdaı, búgin Qasym-Jomart Toqaev jumys saparymen Pavlodar oblysynyń Ekibastuz qalasyna keldi. Memleket basshysy jumys sapary barysynda monoqalalardy damytý jóninde keńes ótkizip, Prezıdenttik jastar kadr rezerviniń ókilderimen kezdesedi. Sonymen qatar qaladaǵy ındýstrıaldy kásiporyndarǵa barady dep josparlanǵan.