Qasym-Jomart Toqaev: EAEO aıasynda saýda-logıstıkalyq júıe jáne kóterme-taratý ortalyqtaryn qurý qajet

NUR-SULTAN. QazAqparat – Eýrazııalyq ekonomıkalyq odaq aıasynda saýda-logıstıkalyq júıe jáne kóterme-taratý ortalyqtaryn qurý qajet. Bul týraly Joǵary eýrazııalyq ekonomıkalyq keńestiń otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Qazaqstan Ózbekstanmen birlesip, Ortalyq Azııanyń saýda-ekonomıkalyq yntymaqtastyǵy halyqaralyq ortalyǵyn qurý boıynsha birlesken jobany júzege asyrýǵa is júzinde kiristi. Atalǵan ortalyq Batys Eýropa – Batys Qytaı strategııalyq avtomagıstraliniń boıynda ornalasatyn bolady. Ol ózara saýda, tranzıt ósimin qamtamasyz etip, taýar aǵynyn aqtaýǵa kómektesedi jáne ónim qaýipsizdigin qamtamasyz etedi», - dedi Qazaqstan Prezıdenti.

Osy rette Memleket basshysy odaqtyń basqa da elderine osyndaı birlesken ınfraqurylymdy birigip damytýdy usyndy.

«Sonymen qatar odaq aıasynda saýda-logıstıkalyq júıe jáne kóterme-taratý ortalyqtaryn qurý da úlken mańyzǵa ıe bolyp keledi. Mundaı júıe elderimizdiń azyq-túlik qaýipsizdigin qamtamasyz etedi, agroónerkásip sektory áleýetin qoldaıdy, shyǵyndardy jáne soǵan oraı negizgi azyq-túliktiń baǵasyn tómendetedi»,- dedi Qasym-Jomart Toqaev.