Qasym-Jomart Toqaev densaýlyq saqtaý uıymdaryna revızııa júrgizýdi tapsyrdy

NUR-SULTAN. QazAqparat – Úkimet óńir ákimderimen birge densaýlyq saqtaý uıymdaryna túgendeý júrgizedi. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Densaýlyq saqtaý júıesin damytý. Ol pandemııa kezinde beriktiktiń qatań synaǵynan ótti. Salanyń barlyq júıeli problemasy shyqty. Buǵan qosa, ózge medıtsınalyq qyzmetter zardap shekti. Bul birden halyqtyń densaýlyǵyna áserin tıgizdi», - dedi Memleket basshysy.

QR Prezıdenti ótken jyly 156 ana ómirden ozǵanyna nazar aýdartty.

«Ótken jyly 156 anadan aıyrylyp qaldyq, ólim-jitim ósimi – 2,8 ese. Bul statıstıkanyń qurǵaq tsıfrlary emes. Bul 156 otbasy úshin orny tolmas aýyr qaza. Ana ólim-jitimi joǵary bolýy sebepteriniń ishinde perzenthanalardyń álsiz jabdyqtalýy jyldan jylǵa baıqalady. Reanımatsııalyq bólimderdiń de jabdyqtalýy qanaǵattanarlyq emes. Aýyr naýqastardy emdeý úshin qural-jabdyqtar men qajetti materıaldar joq. Úkimetke óńir ákimderimen birlesip, kásibı qaýymdastyqtardy otyryp, barlyq densaýlyq saqtaý uıymdaryna túgendeý júrgizýdi tapsyramyn», - dedi Qasym-Jomart Toqaev.