Qasym-Jomart Toqaev bastaǵan depýtattar «Qazaqstan Respýblıkasynyń ardagerler uıymy» qoǵamdyq birlestigi keńesiniń aktıvimen kezdesti
dep habarlaıdy Senattyń baspasóz qyzmeti.
Kezdesýge qatysýshylar aldynda sóz alǵan joǵarǵy palata basshysy bul oqıǵanyń mańyzdylyǵyna toqtala kelip, Uly Jeńis merekesiniń qarsańynda adamzat tarıhynda aýqymy men zardaptarynda teńdesi joq soǵysta erlik kórsetken 15 myńnan astam batyrlardy búkil elimizde qurmet tutatynyn atap ótti.
«Basqa eldermen qatar Qazaqstan da fashızmdi kúıretýge zor úles qosty. Bizdiń ákelerimiz ben atalarymyz is júzinde barlyq maıdandarda soǵysty. Olar 41-shi jyly Máskeý túbinde jaýdy toqtatty, 42-shi jyly Stalıngradty qorǵady, 43-shi jyly Kýrsk doǵasynda aıqasty, Ýkraına men Belorýssııany, 44-shi jyly shabýylmen Shyǵys Eýropa elderin azat etti, Berlındi aldy jáne jeńisti 45-shi jyly Reıhstagqa Jeńis týyn tikti»,-dedi Q.Toqaev.
Tóraǵa atap ótkendeı, bizdiń otandastarymyzdyń 1 mıllıon 700 myńnan astamy maıdandarda soǵysty, júzdegen myń jerlesterimiz aıqastarda kórsetken erlikteri úshin ordendermen, medaldarmen marapattaldy, bes júzge jýyq qazaqstandyqtar Keńes Odaǵynyń Batyry joǵary ataǵyna ıe boldy.
«Bizdiń elimizden alys jerlerde Baýyrjan Momyshulynyń qolbasshylyq daryny men erlikteri, panfılovshy batyrlardyń, pýlemetshi Mánshúk Mámetovanyń, mergen Álııa Moldaǵulova men Ybraıym Súleımenovtiń, ushqysh Talǵat Bıgeldınovtiń, Sergeı Lýganskııdiń jáne basqa da batyrlardyń erjúrektigi keńinen tanymal boldy»,-dedi tóraǵa.
Bári maıdan úshin, bári jeńis úshin degen jalpy halyqtyq soǵysta qazaqstandyqtar tyldaǵy eńbekpen de jeńisti jaqyndata tústi. Halyqtyń erekshe kúsh-jigeri men ólsheýsiz eńbegi arqasynda maıdan tapsyrystaryn oryndaýda tabystarǵa qol jetti. Qazaqstannyń barlyq oblys ortalyqtarynda bolashaq jeńiske laıyqty úles qosqan jańa qorǵanys kásiporyndary paıda boldy.
«1418 kún men túnge sozylǵan Uly Otan soǵysynda kún saıyn 20 myńǵa jýyq keńes adamdary qaza tapqanyn» atap óte kelip, tóraǵa «keıbir saıasatkerler men ǵalymdardyń Uly Otan soǵysynyń qorytyndylaryn qaıta jazýǵa, naqtyraq aıtqanda «qaıta qaraýǵa» talpynystaryna» óziniń qarsylyǵyn bildirdi.
«Meniń oıymsha, bizdiń ortaq Jeńisimizdi - bizdiń negizgi qaǵıdamyzdy tekserýge talpyný - tarıhı, saıası jáne adamgershilik turǵysynda eń kemi durys emes jáne bolmaıtyn másele»,-dedi Q.Toqaev.
«45-shi jylǵy Jeńistiń arqasynda biz beıbit jáne táýelsiz memlekette ómir súrip otyrmyz. Naryqtyq jáne demokratııalyq jańarýlar men ómir deńgeıin kóterýde Qazaqstan qysqa merzimde TMD elderi arasynda kóshbasshyǵa aınaldy. Oǵan Sizder de zor eńbek sińirdińizder. Bizdiń búgingi jetistikterimiz Sizderdiń jeńisterińiz»,-dedi tóraǵa.
Ardagerlerdiń ómir joly, isi men qadamdary jas urpaq úshin erjúrektik pen qaısarlyqtyń jarqyn úlgisi ekenin aıta kelip, tóraǵa Uly Otan soǵysyna qatysýshylar men ardagerlerge qamqorlyq pen kómek berýge Memleket basshysy tarapynan turaqty túrde basa nazar aýdarylyp kele jatqanyn atap ótti. Qazaqstan halqyna jyl saıynǵy Joldaýynda Prezıdent bılik organdary aldyna ardagerler ómirin jaqsartý jónindegi máselelerdi erekshe belgilep, naqty mindetter qoıyp keledi.
Sóz sońynda Q.Toqaev ardagerlerge izgi tilektestigin bildire otyryp «Sizderdiń árqaısylaryńyzdan erlik pen batyrlyq ónegesi kórinedi. Sizder óz eline degen erlik pen ińkárlikti tek soǵys kezinde ǵana emes, odan keıin de memleketke adal qyzmet etýmen jáne erlik isterińizben kórsettińizder, eńbek maıdanyn jalǵastyrdyńyzdar», dedi.
Kezdesýde «Nur Otan» HDP hatshysy S.Gromov, eńbek jáne halyqty áleýmettik qorǵaý mınıstri G.Ábdihalyqova, qorǵanys mınıstriniń orynbasary B.Sembınov, «Qazaqstan Respýblıkasynyń ardagerler uıymy» qoǵamdyq birlestigi Ortalyq Keńesiniń tóraǵasy Q.Súleımenov, Astana qalasy ardagerler aktıviniń músheleri Q.Toqabaev jáne L.Kartaýzov, Aqmola oblystyq ardagerler keńesiniń basshysy Sh.Ábýtálipov pen Qorǵanys mınıstrligi ardagerler Keńesiniń basshysy A.Esenqulov sóz sóıledi.