Qasym-Jomart Toqaev BAÁ-niń jahandyq syılyǵyn kolýmbııalyq mektepke tabys etti

ASTANA. QazAqparat - Memleket basshysy Qasym-Jomart Toqaev «Abý Dabı turaqty damý aptalyǵy» sammıti aıasynda Global High Schools nomınatsııasy boıynsha (Amerıka aımaǵy) Zayed Sustainability Prize syılyǵyn kolýmbııalyq Fundacion Bios Terrae - ICAM Ubate mektebine tabys etti, dep habarlaıdy Aqordanyń baspasóz qyzmeti.

Zayed Sustainability Prize – turaqty damý salasyndaǵy orasan zor jetistigi úshin beriletin Birikken Arab Ámirlikteriniń jahandyq syılyǵy. Bul marapat BAÁ Tuńǵysh Prezıdenti marqum sheıh Zaıd ben Sultan Ál Nahaıannyń gýmanıtarlyq murasyna qurmet belgisi retinde 2008 jyly ótken «Bolashaqtyń energııasy» álemdik sammıtinde taǵaıyndaldy.

Atalǵan syılyq densaýlyq saqtaý, azyq-túlik, energetıka, sýdy únemdi paıdalaný sekildi sanattar boıynsha turaqty damý salasyndaǵy tıimdi jáne ınnovatsııalyq sheshimderi úshin kommertsııalyq emes uıymdarǵa, shaǵyn jáne orta kásiporyndarǵa jáne orta mektepterge beriledi.

2009 jyldan beri álem boıynsha 96 adam osy syılyqtyń ıegeri atandy. Zayed Sustainability Prize syılyǵynyń júldesi – 3 mıllıon AQSh dollary. Bıyl syılyqqa 152 elden 4 538 ótinim túsip, onyń úzdik 30 jobasy fınalǵa ótken.

Foto: akorda.kz