Qasym-Jomart Toqaev BAÁ kompanııalaryn Qazaqstannyń jer qoınaýyn zertteýge shaqyrdy

ÁBÝ-DABI. QazAqparat – Birikken Arab Ámirlikteri - Qazaqstan týrısteri úshin tartymdy elderdiń biri sanalady. Bul týraly BAÁ bıznes ókilderimen kezdesýde Qazaqstan Prezıdenti Qasym-Jomart Toqaev aıtyp ótti, dep habarlaıdy QazAqparat tilshisi.

«Birikken Arab Ámirlikteri - Qazaqstan týrısteri úshin eń tartymdy bes eldiń qataryna kiredi. Jyl saıyn 100 myńǵa jýyq qazaqstandyq osynaý keremet elge kelip ketedi. Qurmetti dostar! Bul týraly aıta otyryp, myna jaıdy atap ótkim keledi: biz yntymaqtastyǵymyzdy tý etip, alǵa jyljýymyzǵa yqpal etetin úlken áleýet baryna senimdimiz», - dedi Qasym-Jomart Toqaev.

Memleket basshysy búgin de qos elde úlken múmkindikter baryn atap ótti.

«Ámirlikter sııaqty Qazaqstan da - mıneraldy resýrstar boıynsha álemdik kóshbasshylardyń biri. Sonymen birge el aýmaǵynyń 25 paıyzy ǵana geologııalyq turǵydan zerttelgen. Qazaqstanda 15 mln shógindi basseın jáne olardyń 130 mln tonnalyq otyn ekvıvalentindegi qory bar», - dedi Qasym-Jomart Toqaev.

Qazaqstan Prezıdenti altyn, qorǵasyn, myrysh, temir, marganets jáne basqa da ken oryndarynyń baryna qaramastan, bizde áli zerttelmegen resýrstar kóp ekenin aıtyp ótti.

«Biz jaqynda Jer qoınaýyn paıdalaný kodeksine túzetý engizip, osy saladaǵy ákimshilik resimderdi edáýir jeńildettik. Bul bastamalardy halyqaralyq sarapshylar men halyqaralyq qaýymdastyqtar qoldap otyr», - dep tolyqtyrdy Qasym-Jomart Toqaev.

Osynyń arqasynda Qazaqstan ınvestıtsııalyq tartymdylyq boıynsha óz pozıtsııasyn jaqsarta túsken.

«Bilimdi, tájirıbeni, qarjylyq jáne kadrlyq resýrstardy eskere otyryp, biz BAÁ kompanııalary Qazaqstannyń resýrstary men jer qoınaýyn zertteýge qatysa alady dep sanaımyz», - dep atap ótti Memleket basshysy.