Qasym-Jomart Toqaev: Azamattardy qaǵaz júzinde ǵana jumysqa ornalastyrý beleń alyp otyr

NUR-SULTAN. QazAqparat – Úkimettiń keńeıtilgen otyrysynda QR Prezıdenti Qasym-Jomart Toqaev Jumyspen qamtýdyń jol kartasy boıynsha atqarylǵan jumysty synǵa aldy, dep habarlaıdy QazAqparat Aqordanyń Twitter-degi paraqshasyna silteme jasap.

Prezıdenttiń aıtýynsha, Jumyspen qamtýdyń jol kartasy qabyldanyp, oǵan 1 trıllıon teńge bólingen. Bul qarjynyń 98,2 paıyzy ıgerildi. Baǵdarlama halyqty eńbekpen qamtyp, iskerlik belsendilikti qoldaý úshin mańyzdy ról atqardy.

«Alaıda ondaǵan jáne júzdegen myń jumys orny ashylǵany týraly aqparatty teksergende, ol zeınetaqy jáne salyq tólemderimen sáıkes kele bermeıdi. Azamattardy qaǵaz júzinde ǵana jumysqa ornalastyrý beleń alyp otyr. Dál osyndaı 15 myń jaǵdaı tirkelgen. Jumysqa ornalasty degen adamdardyń úshten biri zeınetaqy qoryna qarjy aýdarmaǵan bolyp shyqty. Mundaı jaǵdaı Túrkistan, Qyzylorda jáne Jambyl oblystarynda anyqtalyp otyr», dedi Prezıdent.

Memleket basshysy osyndaı esepterdi avtomatty túrde qaıta tekserý tásilderin engizý týraly tapsyrma berdi.

«Jalpy, eńbekpen qamtylǵandardyń 40 paıyzǵa jýyǵy «kóleńkede» qalyp qoıǵan. Men buǵan deıin osyndaı esepterdi avtomatty túrde qaıta tekserý tásilderin engizý týraly tapsyrma berdim», dedi Prezıdent.

Memleket basshysy daǵdarysqa qarsy sharalardyń taǵy bir kemshiligi – bıýdjetke túsetin salyqtyń azdyǵyn aıtyp ótti.

«Jumyspen qamtýdyń jol kartasyna bólingen 1 trıllıonnan nebári 5,5 mıllıard teńge salyq tólengen. Bul – jarty-aq paıyz degen sóz!», - dedi ol.