Qasym-Jomart Toqaev aýyl ákimderin saılaýǵa qatysty pikir bildirdi

NUR-SULTAN. QazAqparat – Memleket basshysy Qasym-Jomart Toqaev kelesi jyldan bastap engiziletin aýyl ákimderin saılaý júıesine qatysty pikir bildirdi, dep habarlaıdy QazAqparat tilshisi.

«Azamattar qandaı da bir uzaqmerzimdi jaǵdaıda emes, jaqyn arada memlekettik saıasattyń naqty nátıjesin kórip, sezine bilýi tıis Halyqaralyq reıtıngterdegi kórsetkishter mańyzdy bolsa da ol azamattarǵa, olardyń áleýmettik kóńil-kúıine áser etpeıtinin túsiný kerek», - dedi Qasym-Jomart Toqaev Ulttyq qoǵamdyq senim keńesiniń otyrysynda.

Prezıdent óz sózinde bastalǵan reformalardyń taǵy bir salmaqty komponenti – aýyl ákimderin tikeleı saılaý ekenin aıtyp ótti.

«Ol saılaý Qazaqstan tarıhynda birinshi ret ótkiziledi. Bul saılaý – tıimdi ári turaqty memlekettik ınstıtýttardy qurýdaǵy mańyzdy qadam bolmaq. Aýyldyq okrýg ákimderin tikeleı saılap alý máselesine úlken jaýapkershilikpen keldik. Aýqymdy daıyndyq jumystary júrgizildi», - dedi ol.

Prezıdent 2020 jyly aýyldyq okrýgterdiń bárinde tórtinshi deńgeıli bıýdjetti engizý jumysy aıaqtalǵanyn málim etti.