Qasym-Jomart Toqaev Altaı Kólginovke: Jer úılerdi gazdandyrý baǵasy nege qymbat?
«Elordany damytýdaǵy jalpy amal-ádisterdiń baǵyt-baǵdary durys dep esepteımin. Álbette, qurylys jumystaryna basa mán bergen abzal. Úı qurylysy bolsyn, mektepter men azamattarǵa qatysty ınfraqurylym jaıly da aıtarym sol. Sebebi elorda óz elimizdegi halyqqa da, syrttan keletin azamattarǵa da tartymdy qala bolýy kerek. Investıtsııalardyń mańyzy zor, sol sebepti bul máselege basa nazar aýdaryp otyrǵandaryńyz durys. Men ınjenerlik ınfraqurylymdy salý jaǵynan Úkimet pen qala ákimdiginiń jumysyn qoldaımyn. Biz buǵan deıin elordanyń ózin sala berdik te, astyndaǵy ınfraqurylymyn umyt qaldyrǵanbyz. Al ınjenerlik, kommýnaldyq ınfraqurylymsyz qala kúnderdiń kúni «tunshyǵyp», bir kúni úlken máselemen betpe-bet kelýimiz múmkin», - dedi Memleket basshysy Úkimettiń keńeıtilgen otyrysynda.
Qasym-Jomart Toqaev sonymen qatar qalany gazdandyrý máselesine jeke toqtaldy.
«Elordany gazdandyrý jumysyn Elbasy Nursultan Ábishuly Nazarbaevtyń ózi tikeleı tapsyrǵan edi. Qazir biraq azamattardyń úılerin gazǵa qosý qarqynyn saqtaý kerek. Jeke úılerdiń gazǵa qosylýy jaǵynan másele baryn estip jatyrmyz. Sebebi olar úshin gazǵa qosylý baǵasy jylyna 500-700 myń teńgege deıin barady eken. Bul óte qymbat soma sekildi. Bul máseleni qalaı sheshesizder?» - dep surady Prezıdent ákimnen.
Bul suraqqa jaýap bergen Nur-Sultan qalasynyń ákimi turǵyndar tarapynan gazdyń baǵasyna degen kelispeýshiligi bolǵanyn moıyndady.
«Biz merdigerlerden baǵany tómendetýdi suradyq. Máselen merdigerler buryn gazǵa qosý úshin ǵana 240 myń teńge suraıtyn. Qazir bul qyzmetti 150 myń teńgege deıin azaıttyq (bul somaǵa gaz qurylǵysy men qosalqy bólshekter quny kirmeıdi - avt.). Olar kelisti. Turǵyndar oǵan qýanyp jatyr. Gazdandyrý qarqynyn azaıtpaımyz. Bári josparda», - dedi ol.