Qasym-Jomart Toqaev: Abaıdyń 175 jyldyǵyn atap ótý rýhanı damýymyz úshin qajet

NUR-SULTAN. QazAqparat - Bıyl Abaı Qunanbaıulynyń týǵanyna 175 jyl tolady. Halqymyzdyń uly perzentiniń mereıtoıyn laıyqty atap ótý úshin arnaıy qurylǵan komıssııa daıyndyq jumystaryn bastap ketti.

Bul týraly óziniń «Abaı jáne HHІ ǵasyrdaǵy Qazaqstan» atty maqalasynda Qazaqstan Prezıdenti Qasym-Jomart Toqaev jazdy, dep habarlaıdy QazAqparat.

Maqalada Prezıdent uly Abaıdyń 175 jyldyǵy aıasynda memleket kóleminde jáne halyqaralyq deńgeıde aýqymdy is-sharalar uıymdastyrý josparlanyp otyrǵandyǵyn atap ótti.

«Biraq munyń bári toı toılaý úshin emes, oı-órisimizdi keńeıtip, rýhanı turǵydan damýymyz úshin ótkizilmek. Abaı Qunanbaıuly ǵulama, oıshyl, aqyn, aǵartýshy, ulttyń jańa ádebıetiniń negizin qalaýshy, aýdarmashy, kompozıtor retinde el tarıhynda óshpes iz qaldyrǵany sózsiz. Onyń óleńderi men qara sózderinde ult bolmysy, bitimi, turmysy, tirshiligi, dúnıetanymy, minezi, jany, dini, dili, tili, rýhy kórinis taýyp, keıin Abaı álemi degen biregeı qubylys retinde baǵalandy. Ótken jyly Abaıdyń shyǵarmalarynan úzindi oqý estafetasy ótti. Láılim atty oqýshy qyz usynǵan bul eldik sharaǵa men de qatysyp, qoldaý kórsettim. Mektep oqýshylarynan el azamattaryna, tipti, álemdik deńgeıdegi tanymal tulǵalarǵa deıin zor qyzyǵýshylyq tanytyp, lezde ilip áketken bul bastama birneshe aıǵa ulasty»,-dep jazdy Qasym-Jomart Toqaev.

Sonyń arqasynda búkil Qazaqstan Abaı murasyn taǵy bir zerdelep shyqty.

«Bul – Abaıǵa degen qurmet ári urpaqty tárbıeleýdiń tıimdi tásili. Abaı jyrlaryn oqý chellendji bıyl, aqyn mereıtoıy tusynda jańasha jandanady dep senemin»,-dep jazady Memleket basshysy.

Aıta keteıik, Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy «Egemen Qazaqstan» basylymynyń búgingi sanynda jarııalandy.