Qasym-Jomart Toqaev 2026 jyly Qazaqstanda óńirlik klımattyq sammıt ótkizýdi usyndy
«Elderimiz klımattyń ózgerý saldarymen jıi betpe-bet kelip otyr. Bul turaqty damý úshin qosymsha qater tóndire otyryp, azyq-túlik qaýipsizdigine tyrys yqpal etedi. Qazaqstan halyqaralyq qoǵamdastyqtyń belsendi ári jaýapty múshesi retinde 2060 jylǵa qaraı kómirtegi beıtaraptyǵyna qol jetkizý maqsatyn qoıyp otyr. Ol úshin ózekti klımattyq tendentsııalar men halyqaralyq mindettemelerdi eskere otyryp, tıisti strategııa bekitilgen. Biz tuıyq tsıkl ekonomıka ustanymdaryn belsendi engizip jatyrmyz. Elimizdiń energııa teńgerimi qurylymyndaǵy jańaratyn energııa kózderiniń úlesi 4,5 paıyzǵa jetti. 2030 jylǵa qaraı bul kórsetkish 15 paıyzǵa jetýi tıis», - dedi Qasym-Jomart Toqaev.
Prezıdent osy turǵyda «Global Gateway» strategııasyn jáne «Team Europe» bastamasyn iske asyrý aıasynda Ortalyq Azııadaǵy klımattyń ózgerýi, sý resýrstary, jańartylatyn energııa kózderin damytý máseleleri boıynsha birlesken kúsh-jigerdi jandandyrý oryndy bolatyndyǵyn basa aıtty.
«Araldy qutqarý halyqaralyq qorynyń qyzmeti aýqymynda birlesken kúsh-jigerdi jandandyrýǵa erekshe nazar aýdarý qajet. Almaty qalasynda Ortalyq Azııa elderiniń klımat jáne jasyl energetıka máseleleri jónindegi jobalyq keńsesin qurýdy, sondaı-aq 2026 jyly Qazaqstanda óńirlik klımattyq sammıt ótkizýdi usynamyz», - dedi Memleket basshysy.