Kastamoný qalasynda «Túrki álemindegi jyl ádebıetshisi» anyqtaldy
TIKA-men seriktes «Avrasıa» Jazýshylar odaǵy men Halyqaralyq Túrki áleminiń uıymy (TÚRKSOI) uıymdastyrǵan túrki áleminiń ádebı jýrnaldarynyń toǵyzynshy Kongresi 16 halyq men qoǵamdastyqtyń 28 ádebıetshisiniń basyn qosty. Olardyń ishinde Ázerbaıjan, Qazaqstan, Qyrǵyz Respýblıkasy, Ózbekstan, Tatarstan, Bashqurtstan, Qyrym, Gagaýzııa (Moldova), Irak, Iran, Kosovo, Makedonııa, Soltústik Kıpr elderiniń aqyn-jazýshylary bar.
«Ózderińiz biletindeı, túrki áleminiń óneri men mádenıetine zor úles qosqan kórnekti qaıratkerlerdiń eńbegin eleı otyryp, TÚRKSOI olardyń qurmetine estelik jyldyń jarııalanǵanyn málimdedi. Osy jyly mundaı mańyzdy datalardyń qatarynda ázirbaıjan aqyny Qara Qaraevtyń 100 jyldyǵy, qazaq aqyny Maǵjan Jumabaevtyń 125 jyldyǵy jáne qyrǵyz jazýshysy Shyńǵys Aıtmatovtyń 90 jyldyǵy enip otyr», - dedi TÚRKSOI-dyń Bas hatshysy Dúısen Qaseıinov.
Sonymen qatar, ol qaıtys bolǵan klassıkterge qurmet kórsetýmen qatar, zamandastarymyzdyń shyǵarmashylyǵy men darynyn laıyqty baǵalaý kerektigin atap ótti. TÚRKSOI bas hatshysy osy rette tirisinde aty ańyzǵa aınalǵan Ázerbaıjan Jazýshylar odaǵynyń tóraǵasy Anar Yrzaevty atap ótip, kongrestiń ashylýynda oǵan TÚRKSOI-dyń Qurmet gramotasy tabystaldy.
Anar Yrzaev Kastamonýǵa tuńǵysh ret kelgenin moıyndady.
«Men Kastamonýdan Túrki áleminiń nuryn kórdim, munda búkil Túrkııany kórýge bolady. Bul jerde Túrkııanyń barlyq nyshandaryn, onyń barlyq tabıǵı jáne mádenı muralaryn sezindim», - dedi ol marapattaý rásiminde.
Budan buryn da habarlanǵanyndaı, bıylǵy jyly Anar Yrzaev seksenniń seńgirine shyqqan mereıtoıyn atap ótedi. Jazýshyny TÚRKSOI bas hatshylyǵy saltanatty túrde quttyqtady. Sonymen qatar, shara barysynda Anar Yrzaevtyń «Meniń zamandastarym» kitabynyń túrki tilinde tusaýy kesildi.
Kongrestiń ashylýynda «Túrki álemindegi jyl ádebıetshisi» syılyǵynyń ıegerin marapattaý saltanaty ótti. 2017 jyly Túrkistan qalasynda ótken Túrki álemi ádebı jýrnaldarynyń segizinshi kongresiniń sheshimine sáıkes, syılyqqa bul joly Tatarstan (RF) jazýshysy Zınnýr Mansýrov ıe boldy.
Jıynda sóz alǵan jyldyń úzdik ádebıetshisi Zınnýr Mansýrov búgin óz ómirimdegi eń baqytty kúnderdiń biri ekenin aıtty.
«Buǵan deıin kóptegen marapattarǵa ıe boldym. Alaıda bul marapat men úshin erekshe. Sebebi, meni bul syılyqqa Túrki álemi laıyq dep bildi. Aramyzda ádebıetti ádemi shyǵarmalarymen baıytqan kóptegen tanymal jazýshylar men aqyndarymyz otyr. Men aqyndarymyz ben jazýshylarymyzǵa júginemin. Biz biriksek kúshti bolamyz - túrki álemi úshin bar múmkindikti jasaımyz. Ekonomıka, saýda jáne saıasat salasyndaǵy birlik pen yntymaqtastyqtyń mańyzdylyǵy belgili. Biraq, eger biz mádenı jáne rýhanı birlikke qol jetkize alsaq, onda bul bárinen de úlken jeńis bolady», - dedi Mansýrov.