Kásipqoı boks: Jánibek Álimhanulynyń kezekti qarsylasy týraly ne bilemiz

<p>ASTANA.KAZINFORM - WBO/IBF tujyrymy boıynsha orta salmaqtaǵy álem chempıony Jánibek Álimhanuly (15-0, 10 KO) 4 qazan kúni IBF tıtýlyna mindetti qarsylasy Andreı Mıhaılovıchpen (21-0, 13 KO) qolǵap túıistiredi. Osy oraıda, Jánibektiń qarsylasy týraly saralap kórgen edik.</p>

Andreı Mıhaılovıch Drıssen 1997 jyly 15 jeltoqsan kúni Reseıdiń Sankt-Peterbýrg qalasynda dúnıege kelgen. 1999 jyly, jańa zelandııalyq otbasy Mıhaılovıch jáne onyń egiz aǵasyn 18 aılyq kezinde balalar úıinen asyrap alǵan.

Mıhaılovıch áýesqoı boksta jaqsy nátıjelerge qol jetkizdi. Áýesqoı mansabynda ol birneshe márte Jańa Zelandııa ulttyq chempıonattarynda baq synady jáne Soltústik araldaǵy «Altyn qolǵap» chempıonatynyń jeńimpazy atandy.

2018 jyly ol óziniń qazirgi jattyqtyrýshysy jáne menedjeri Isaak Pıchpen tanysyp, sol jyldyń sáýirinde kásipqoı bokstaǵy alǵashqy kezdesýin Rob Remsıge qarsy ótkizdi.

Kásipqoı bokstaǵy mansabynyń alǵashqy 12 aıynda ol 8 jekpe-jek ótkizip, burynǵy WBA PABA jáne Jańa Zelandııa chempıony Adrıan Taıhıany, sondaı-aq, burynǵy IBO Okeanııa chempıony Cheız Heılı syndy myqty qarsylastardy jeńdi.

26 jastaǵy boksshy kásipqoı reıngte 21 jekpe-jek ótkizip, barlyǵynda jeńiske jetse, 13 aıqasyn merziminen buryn aıaqtaǵan. Bul kúnde ol orta salmaqtaǵy IBF Pan-Pacific jáne WBO Global tıtýldaryn ıeledi.

BoxRec portalyndaǵy orta salmaqtaǵy álemdik reıtıngide jańa zelandııalyq boksshy 21- orynda.

Aıta keterligi, Jánibek Álimhanuly Mıhaılovıchtyń kásipqoı mansabyndaǵy eń myqty qarsylasy. Bul jekpe-jek onyń alǵashqy ret álem chempıony tıtýlyna talasýy.

Buǵan deıin habarlaǵanymyzdaı, Jánibek búgin jekpe-jek aldyndaǵy salmaq ólsheý rásiminen ótti. Jánibek tarazyda 159,6 fýnt (72,3 kg) boldy, al Andreı- 159,9 fýnt (72,5 kg) shyqty. 

Keshe baspasóz máslıhatynda Jánibek qarsylasyn jeńetinine senimdi ekenin, Sıdneıde elimizdiń baıraǵyn jelbiretkisi keletinin aıtqan edi.

Aıta keteıik, Jánibek - Andreı jekpe-jekgi No Limit Boxing promoýterlik kompanııasynyń uıymdastyrýymen 4 qazan kúni Avstralııanyń Sıdneı qalasyndaǵy The Star arenasynda ótedi.

Boksshylar IBF álem chempıony ataǵy úshin judyryqtasady. 

Kásipqoı boks keshin qazaqstandyqtar «Qazsport» telearnasynan tikeleı efırinen kóre alady. 

Eske sala ketsek, eki boksshy arasyndaǵy aıqas 13 shilde kúni Las-Vegaste (AQSh) ótýi tıis edi. Alaıda, otandasymyz salmaq qýý saldarynan esinen tanyp qalǵan bolatyn.