Aqtóbede káriz-sorǵy stansasynda eki jumysshy kóz jumdy

<p>AQTÓBE. KAZINFORM &ndash; Aqtóbe oblysy Embi qalasynda &laquo;Embi jylý&raquo; KMK-niń eki jumysshysy qaza tapty. Taǵy ekeýi aýrýhanaǵa tústi. Olar káriz stansasyn jóndeý jumystaryn júrgizgen.</p>

Oqıǵa búgin tús mezgilde boldy. Embi qalasynyń ákimi Raıymbek Mýsaǵalıdiń aıtýynsha, shaharda 5 káriz-sorǵy stansasy bar. Sonyń bireýinde jóndeý jumystary júrgizilip, jumysshylary kenetten qaza tapty. 

- Saǵat 12:30-da maǵan «jumysshylar qaza tapty» degen habar keldi. Birden oqıǵa ornyna bardym. Sol kezde eki adamnyń denesin shyǵarǵan, ekeýin aýrýhanaǵa alyp ketken. Bir adam jumys istep, bir-birin qutqarmaq bolyp kóz jumǵan sekildi. Kóz jumǵan eki adam da 58 jasta, - dedi Embi qalasynyń ákimi Raıymbek Mýsaǵalı. 

Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, aman qalǵan 46 jáne 53 jastaǵy er adam dereý aýrýhanaǵa jetizildi. Olarǵa «metan gazyna ýlanǵan» dıagnozy qoıyldy. 

- Aýrýhanaǵa jetkizilgen adamdardyń jaǵdaıy birqalypty. Shaǵymy joq,- dedi Aqtóbe oblystyq densaýlyq saqtaý basqarmasynyń baspasóz qyzmeti. 

Aqtóbe oblystyq TJD baspasóz qyzmetiniń habarlaýynsha, eki adamnyń denesin qutqarýshylar alyp shyqqan. Al oblystyq PD baspasóz qyzmetiniń habarlaýynsha, Qylmystyq kodekstiń «Eńbekti qorǵaý qaǵıdalaryn buzý» baby boıynsha is qozǵaldy.