Kásipker áıelderdi qoldaýǵa 16,9 mln dollar bólindi

<p>ALMATY. KAZINFORM — EQDB baǵdarlamasy arqyly kásipker áıelderdi qoldaý úshin Úkimetten 2015-2025 jyldarǵa 17 mln dollarǵa jýyq qarjy bólindi. Bul týraly baspasóz máslıhat barysynda Eýropalyq qaıta qurý jáne damý bankiniń Qazaqstandaǵy shaǵyn jáne orta bıznesti damytý jobasynyń mamany Mahabbat Kabıraeva aıtty.</p>

Spıkerdiń sózinshe, Úkimet Qazaqstandaǵy shaǵyn jáne orta bıznesti, onyń ishinde áıelder kásipkerligin damytýǵa erekshe kóńil bóledi.

Bıznestegi arýlar bıznes-ıdeıalaryn júzege asyrý, kompanııasyn damytý men jańa jumys oryndaryn ashý úshin berilgen memlekettik qoldaýdy tıimdi paıdalanyp jatyr. 

Odan bólek EQDB men Qazaqstan Úkimetiniń «Mıkrobıznestegi áıelder» jobasy kásipker áıelderge bıznesti basqarý jáne naryqtaǵy tabysty básekege jetý úshin kásibı mashyqtanýǵa múmkindik beredi.

«Shaǵyn jáne orta bıznespen aınalysatyn qazaqstandyq áıelderdiń bilimin jetildiri úshin Úkimetten 2015-2025 jylǵa 16,9 mln dollar bólindi. Bul jumys istep turǵan kishi bıznestegi qyz- kelinshekterge arnalǵan oqý baǵdarlamasy. Óıtkeni, keıbir kásipker áıelder belgili bir resýrstardyń shektelýine baılanysty, problemalarǵa tap bolyp jatady», — dedi Mahabbat Kabıraeva.

Sonymen qatar, ol kásipkerlikke jańadan kelgen qyz-kelinshekter qandaı problemaǵa jıi ushyraıtynyn aıtty.

«Bıznes salasyna jańadan aıaq basqan áıelder kóbine qarjy basqarý, maman tańdaý jáne qol astyndaǵy qyzmetkerlermen til tabysý boıynsha qıyndyqtarǵa tap bolady. Mine, „Mıkrobıznestegi áıelder“ jobasy osyndaı túıitkil dúnıeniń sheshimin taýyp beredi», — deıdi ol.

Buǵan deıin oqytý qazaq jáne orys tilderinde onlaın-formatta 5 aı boıy ótetinin jazǵan edik. 

Qatysýshylar oqýdy kez kelgen ýaqytta baǵdarlama aıasynda bastaı alady.

Kýrs bıznestiń negizgi aspektilerin qamtıtyn 6 modýlden turady: marketıng, satý, qarjy, jeke basqarý, operatsııalyq basqarý, strategııa, avtomattandyrý jáne jasandy ıntellekt.