Kaspııge aǵyp jatqan qara suıyqtyq qaýipti emes – MAEK-Qazatomónerkásip

NUR-SULTAN. QazAqparat – Aqtaý qalasy mańynda Kaspıı teńizine qubyrdan qara tústi suıyqtyqtyń atqylap jatqanyn baıqaǵan turǵyndar alańdaýshylyq bildirip, áleýmettik jelilerde vıdeo taratty. «MAEK-Qazatomónerkásip» JShS osy jaıtqa baılanysty málimdeme jasady, dep habarlaıdy QazAqparat.

Kásiporyn málimetinshe, teńizdiń tartylýyna baılanysty arnaýly qurylǵylarmen ónerkásipke sý qabyldaıtyn arnanyń tabany tereńdetilip jatyr. Bul jumystar Kaspıı teńiziniń ekologııalyq qaýipsizdigine áser etpeıdi.

«JES-1 qabyldaý arnasy JES-1 tehnologııalyq qajettilikterine jáne «Kaspıı» sý tuşytý zaýyty» JShS-de aýyz sý daıyndaý úshin teńiz sýyn jınaýǵa arnalǵan. Búgingi tańda Kaspıı teńiziniń kúrt taıazdanýyna baılanysty qabyldaý arnasynda sý deńgeıi tómendep ketti, keı tustarynda qurǵaq jerler paıda boldy. Arnada teńiz sýynyń qajetti deńgeıde bolýyn qamtamasyz etý jáne JES-1 men «Kaspıı» sý tuşytý zaýyty» JShS-de tehnologııalyq protsestiń toqtap qalýynyń aldyn alý úshin «MAEK-Qazatomónerkásip» JShS JES-1 qabyldaý arnasynda tabandy tereńdetý jumystaryn júrgizip jatyr. Bul jumystar zemsnarıad qurylǵysynyń kómegimen mehanıkalyq túrde atqarylady. Arnadan tartylatyn sý – eshqandaı qospasyz teńiz sýy»

, - delingen kásiporyn málimdemesinde.

Óńirlik kommýnıkatsııalar qyzmetinen belgili bolǵanyndaı, ekologtar tekserý júrgize bastady.

Vıdeo Aqtaý qalasynyń mańyndaǵy «Dostar» jaǵajaıy men «Keppel-Kazakhstan» JShS ortasynda túsirilgen.

Eske sala ketsek, Energetıka mınıstri Bolat Aqsholaqov Kaspıı qubyr konsortsıýmy aqaýynan kelgen shyǵyn eleýli emestigin aıtqan bolatyn.