Kaspııdiń daýly máseleleri kelissózder arqyly sheshilýi kerek - sarapshylar

MÁSKEÝ. QazAqparat - Qazaqstan, Reseı men Ázerbaıjan sarapshylary Astrahanda ótken halyqaralyq jıynda Kaspıı mańy elderiniń ózara yntymaqtastyǵy, qazirgi jaǵdaıy men bolashaǵy taqyrybyn talqylady, dep habarlaıdy «QazAqparat» HAA Máskeýdegi menshikti tilshisi.

Іs-sharanyń moderatory bolǵan «Kaspıı-Eýrazııa» ortalyǵynyń basshysy Andreı Syzranov atap ótkendeı, Kaspıı óńiri kómirsýtek qoryna baı jáne geosaıası jáne geostrategııalyq qyrynan erekshe bolǵandyqtan, birqatar óńirden tys oıynshylardyń nazaryn ózine aýdarýda.

Sondaı-aq Syzranov «árbir taraptyń óz qyzyǵýshylyǵy bar, Kaspııdiń bizdiń ortaq úıimiz ekendigin umytpaýymyz kerek jáne kórshilerdiń múddesi - óńirden tys derjavalardyń soıylyn soqpaýy mańyzdy» ekendigin atap ótti.

 «Dóńgelek ústel aıasynda talqylanyp jatqan taqyryptar Kaspıı mańy elderi úshin ózekti bolyp tabylady. Mundaı alańdar ózara qarym-qatynasty nyǵaıtýǵa negiz bolady, sondaı-aq barlyq tarapqa tıimdi sheshim qabyldaýǵa áser etedi», - dep óz oıymen bólisti reseılik sarapshy Renat Qalıev.

Qazaqstandyq sarapshy, «Alternatıva» ózekti zertteý ortalyǵynyń dırektory Andreı Chebotarev Kaspıı mańy elderiniń yntymaqtastyǵyn nyǵaıtý kerektigin atap ótti.

«Kaspııdi aınala qonystanǵan 5 eldiń yntymaqtastyǵy álsiz. Kaspıı máselesi boıynsha túrli suraqtar jan-jaqty talqylaýdy qajet etedi. Sırııadaǵy shıelenis, Taıaý Shyǵysta terrorızm men ekstremızmniń órshý múmkindigi atalǵan aýmaqtaǵy elderdiń yntymaqtastyǵyn nyǵaıtý máselesin ózektendire tústi», - dedi sarapshy.

Jıynda sarapshylar Kaspıı óńirindegi saıasat, ekonomıka jáne qaýipsizdik máseleleri boıynsha kelisilgen áreketter men sharalardy ázirleý qajet degen baılamǵa keldi.