Kaspııden balyq aýlaıtyn zamanaýı kemeler satyp alyndy

<p>ASTANA. KAZINFORM — Keler jyly Mańǵystaý oblysynda Kaspıı teńizinen balyq aýlaý kásibin 20 myń tonnaǵa jetkizý jospary qoıyldy.</p>

— Mańǵystaýda balyq sharýashylyǵyn damytý — óńirdiń áleýetti damý baǵyttarynyń biri. Aımaqta balyq ósirýmen 3 kásiporyn aınalysady. Olar bıyl 11 aıda 45,5 tonna bekire tuqymdas jáne jaıyn balyqtaryn ósirdi. Mańǵystaýda 30 jyl úzilisten keıin kásibı balyq aýlaý sharýashylyǵyn damytýdy qolǵa aldyq. Keńes dáýiri kezinde qarqyndy damyp, keıin toqtap qalǵan bul sharýashylyqty qaıta jańǵyrtý úshin birqatar ınvestor tartyldy. Búginde Kaspııden balyq aýlaıtyn zamanaýı kemeler satyp alyndy. Keler jyly taǵy tórt keme alýdy josparlap otyrmyz. Osylaısha 2025 jyly teńizden 20 myń tonnaǵa deıin balyq aýlaý kózdelip otyr, — dedi Mańǵystaý oblysynyń ákimi Nurdáýlet Qılybaı óńirdiń áleýmettik-ekonomıkalyq damýy týraly esep bere turyp.

Ákim usynǵan málimetke súıensek, 2025-2027 jyldary quny 12 mlrd teńge bolatyn 8 ınvestıtsııalyq jobany iske asyrý jospary bar.

— Onyń ishinde eń irisi — «Organic fish» seriktestiginiń tor qorshamada bekire tuqymdas balyq túrlerin ósirý jobasy. Jobanyń qýaty jylyna 5 myń tonna, ınvestıtsııalyq quny 7,4 mlrd teńge. Atalǵan jobalar iske qosylǵanda turaqty jumys oryndary ashylyp, «Qazaqstanda jasalǵan» degen otandyq brendpen el naryǵyn jergilikti ónimmen qamtıdy, — deıdi oblys basshysy. 

Aıta keteıik, jyl basynan beri Aqtaý portynan 6,8 mln tonna júk tasymaldanyp, ósim 3,5%-ǵa artty.