Kaspııdegi ıtbalyqtardyń naqty neden qyrylǵanyn anyqtaý múmkin emes - mınıstrlik

NUR-SULTAN. QazAqparat - Maýsymnyń birinshi onkúndiginde ıtbalyqtardyń ólekseleri tabylǵan jerlerden tekserý nátıjeleri alyndy, dep habarlaıdy QazAqparat QR Ekologııa, geologııa jáne tabıǵı resýrstar mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, Gıdrobıologııa jáne ekologııa ınstıtýtynyń, «Mıkrobıologııa jáne vırýsologııa ǵylymı-óndiristik ortalyǵy» JShS, «Qazaqstandyq Qoldanbaly Ekologııa Agenttigi» JShS ǵylymı qyzmetkerleri, sondaı-aq Balyq sharýashylyǵy komıteti, Mańǵystaý oblysynyń ekologııa departamenti jáne QR Aýyl sharýashylyǵy Veterınarııalyq baqylaý jáne qadaǵalaý komıtetiniń aýmaqtyq bólimsheleriniń quzyretti memlekettik organdarynyń ókilderi qatysqan talqylaý nátıjesi boıynsha bıylǵy jyldyń 24 maýsymynda ıtbalyqtardyń ólimi boıynsha qorytyndy daıyndaldy.

Osy qorytyndyǵa sáıkes, tabylǵan ólekselerdiń qatty ydyraýyna baılanysty, janýarlardyń óliminiń naqty sebepterin anyqtaý múmkin bolmady. Sonymen qatar, ǵalymdar men quzyretti memlekettik organdardyń pikirinshe, jańa týǵan kúshikterdiń muz ústinde ashyq teńizge shyǵarý saldarynan olardyń álsizdenýi, kúshikterdiń sýǵa túsýi saldarynan qatyp qalýy, eresek ıtbalyqtardyń balyq aýlaý torlaryna túsýi, sondaı-aq olardyń kemelerdiń burandalaryna túsýi ólýiniń yqtımal sebepteri bolýy múmkin.

Ǵylymı uıymdar men múddeli memlekettik organdardyń ókilderi Kaspıı teńizinde júrgizilip jatqan túp tereńdetý jumystary tabylǵan ıtbalyqtardyń qyrylýyna tikeleı áser etpeıdi jáne olardyń ólýiniń yqtımal sebebi retinde qarastyryla almaıdy degen ortaq pikirge keldi.

Kaspıı ıtbalyǵy transshekaralyq sý janýarlary bolǵanyna baılanysty, 2021 jylǵy qyrkúıekte Qazaqstan men Reseıdiń XVII aımaqaralyq yntymaqtastyq forýmy barysynda Qazaqstan men Reseı Ekologııa mınıstrlikteri arasynda Kaspıı ıtbalyǵynyń popýlıatsııasyn saqtaý jónindegi 2021-2026 jyldarǵa arnalǵan birlesken is-qımyl josparyna qol qoıyldy.

«Memleket basshysy Kaspıı ıtbalyǵy popýlıatsııasynyń azaıýyn sheshý máselesin jeke baqylaýyna aldy jáne búgingi kúni Mınıstrlik Kaspıı ıtbalyǵynyń kóbeıý jáne mekendeý oryndaryn saqtaý úshin erekshe qorǵalatyn tabıǵı aýmaq qurý máselesin pysyqtaýda. Búgingi tańda tıisti jaratylystaný-ǵylymı negizdeme ázirlenýde.

Budan basqa, 2020 jyldan bastap Kaspıı ıtbalyǵy janýarlardyń sırek kezdesetin jáne quryp ketý qaýpi tóngen túrleriniń tizbesine engizildi (Qazaqstan Respýblıkasynyń Qyzyl kitaby) jáne QR Qylmystyq kodeksine sáıkes, janýarlardyń sırek kezdesetin jáne quryp ketý qaýpi tóngen túrlerin aýlaý 3000 AEK deıin aıyppul salýǵa nemese 3 jylǵa deıin bas bostandyǵyn shekteýmen jazalanady.

Óz kezeginde, bıylǵy jyldyń kókteminde Kaspıı teńiziniń jaǵalaýynda ıtbalyqtardyń ólekseleri tabylǵanyna baılanysty Mańǵystaý oblysynyń polıtsııa departamentine protsestik sharalar qabyldaý úshin tıisti materıaldar joldandy»,-delingen mınıstrliktiń habarlamasynda.