Kaspııdegi «Qashaǵan» kenishinen óndirilgen munaı 100 mln tonnaǵa jetti

<p>Kaspıı teńiziniń qazaqstandyq sektoryndaǵy iri kenish &mdash; &laquo;Qashaǵannan&raquo; 100 mln tonna munaı óndirilgen, dep habarlaıdy Kazinform.</p>

Bul týraly Soltústik Kaspıı jobasynyń operatory — NCOC kompanııasynyń basqarýshy dırektory Olıve Lazar málim etti.

«Búgingi aıryqsha beleske eń aldymen qaýipsizdikke, odan keıin ónimdilikke basymdyq beretin NCOC kompanııasynyń qyzmetkerleri men merdigerleriniń erekshe adaldyǵy jáne tájirıbesiniń arqasynda qol jetkizdik. Biz aktsıonerlerge, respýblıkalyq jáne aımaqtyq memlekettik organdarǵa qoldaýlary úshin alǵysymyzdy bildirgimiz keledi. Bul jetistik – komandalyq jumystyń, kásipqoılyqtyń jáne barlyq qatysýshynyń qosqan úlesiniń dáleli», - dep habarlady Olıve Lazar.

«Qashaǵan» ken ornyn ónerkásiptik ıgerý 2016 jyly bastalǵan. Bul — sońǵy 40 jylda ashylǵan eń iri munaı ken oryndarynyń biri. Onyń óndiriletin qory shamamen 9-13 mıllıard barrel (1-2 mıllıard tonna) munaıdy quraıdy. Munaı teńiz tabanyndaǵy 4 200 metr tereńdikten óndiriledi. Ken ornyn ıgerý jobasynyń І kezeńine shamamen 55 mıllıard AQSh dollary kóleminde ınvestıtsııa salynǵan.

Eske sala ketelik, budan buryn Kaspıı qubyr konsortsıýmy Qazaqstannan 56 mln tonna munaı tasymaldaǵanyn jazǵan bolatynbyz.