Kaspııdegi «Qashaǵan» ken ornynda munaıdyń tógilgeni anyqtalmaǵan
Osyǵan baılanysty Soltústik Kaspıı jobasynyń operatory – NCOC kompanııasynyń syrtqy qarym-qatynastar bólimi túsinik berdi.
«NCOC kompanııasy óz qyzmetin emıssııalar úshin berilgen ruqsattarda belgilengen normalar men standarttar jáne qorshaǵan ortaǵa áserdi baǵalaý sheńberinde júrgizedi. Bıylǵy 30 naýryzda saǵat 7:43-te teńizdegi «Qashaǵan» kesheninde munaıdyń, sarqyndy sýdyń nemese basqa suıyqtyqtardyń tógilýi týraly boljamdy aqparat boıynsha dálelder joq. Al 30 naýryzda SENTINEL-1A jáne 2 sáýirde TerraSAR-X jerseriginen túsirilgen sýretterde Soltústik Kaspıı aýmaǵynda, onyń ishinde «Qashaǵan» ken ornyndaǵy D aralynan soltústikke qaraı ornalasqan shaǵyn aımaqta tabıǵı qubylys baıqaldy. Kelesi kúnderi túsirilgen sýretterde mundaı qubylys kórinbedi», - dep habarlady syrtqy qarym-qatynastar bólimi.
Áleýmettik jelide jarııalanǵan aqparatqa sáıkes Kaspıı teńizindegi D araly mańyndaǵy alań tekserilgen. Onda munaıdyń tógilgeni anyqtalmaǵan. Qazir NCOC kompanııasynyń teńizdegi nysandary qalypty rejımde jumys istep tur.
Eske sala ketelik, buǵan deıin «Qashaǵannan» munaı óndiretin NCOC kompanııasy 12,4 mlrd teńge aıyppul tólegenin habarlaǵan edik.
Al keshe Kaspıı teńizindegi «Qashaǵan» ken ornynda munaı tógilýi múmkin ekenin jazǵan bolatynbyz.
Sondaı-aq, jergilikti ekologtar «Qashaǵanda» munaı tógilgeni rastalsa, jospardan tys tekserý júrgiziletinin aıtqan edi.