Kaspııde joǵalǵan balyqshylardyń biriniń denesi tabyldy

<p>AQTAÝ. KAZINFORM - Mańǵystaýda qutqarýshylar sáýir aıynyń basynda Túpqaraǵan aýdanynyń aýmaǵynda teńizde joǵalyp ketken balyqshylardyń biriniń denesi tapty.</p>

Oblystyq tótenshe jaǵdaılar departamenti tótenshe jaǵdaılardy joıý basqarmasy bastyǵynyń mindetin atqarýshy Dinmuhammed Pirimjan izdeý jumystary kezinde bir balyqshynyń denesi tabylyp, izdeý jumystary jalǵasyp jatqanyn málimdedi.

"20 sáýir kúni keshki saǵat 21:00-de Túpqaraǵan aýdany Fort-Shevchenko qalasynan jıyrma shaqyrym qashyqtyqta teńiz jaǵalaýynan 400 metr jerden joǵalǵan azamattyń biriniń denesi jergilikti balyqshylardyń kómegi arqyly 5 metr terendikten tabyldy. Qazirgi ýaqytta joǵalǵan ekinshi balyqshyny izdestirý jumystary júrgizilip jatyr", - dedi azamattyq qorǵaý aǵa leıtenanty Dinmuhammed Pirimjan.

Sáýir aıynynyń basynda Kaspııde eki balyqshynyń joǵalyp ketkeni týraly málim bolǵan edi.

Keıin Mańǵystaý oblysynyń Tótenshe jaǵdaılar departamentiniń qutqarý qyzmeti balyqshylardyń 1985 jáne 1982 jyly týǵan turǵyndar ekenin málimdedi. Anyqtalǵan derek boıynsha jergilikti turǵyndar 2 sáýir kúni keshki saǵat 22:30 shamasynda úrlemeli qaıyqpen balyq aýlaýǵa ketkennen keıin qaıtyp oralmaǵan.