Kaspııde zańsyz ornatylǵan 3 myńnan astam sıntetıkalyq aý tabyldy
Balyq sharýashylyǵy komıteti baspasóz qyzmetiniń málimetine súıensek, balyq qorǵaý aktsııasy 1 sáýir-31 mamyrda Atyraý, Mańǵystaý jáne Batys Qazaqstan oblystary aýmaǵyndaǵy Jaıyq-Kaspıı basseıniniń sý aıdyndarynda ótti. Aktsııa kezinde Jaıyq-Kaspıı oblysaralyq basseındik balyq sharýashylyǵy ınspektsııasynyń memlekettik ınspektorlary quqyq qorǵaý jáne tabıǵat qorǵaý organdarymen birlesip balyq qorǵaý zańnamasyn buzýdyń 1 262 deregin anyqtaǵan. Onyń ishinde Atyraýda – 952, Mańǵystaýda – 137, Batys Qazaqstan oblysynda 173 quqyq buzýshylyq tirkelgen.
«Osy kezeńde 862 quqyq buzýshy ákimshilik jaýapkershilikke tartyldy. Onyń 114-ine sot tártibimen 56 qylmystyq is qozǵaldy. Tártip buzýshylarǵa 15,4 mln teńge aıyppul salyndy. Zańsyz aınalymnan 35 tonnadan astam balyq tárkilendi. Onyń 4,6 tonnasy – bekire tuqymdas balyq túrleri. Sondaı-aq, 908 aý, 95 qaıyq, 23 kólik tárkilendi. Jaıyq-Kaspıı basseıniniń sý qoımalarynan sıntetıkalyq monojipten toqylǵan, zańsyz ornatylǵan 3 035 aý tabyldy», - dep habarlady Balyq sharýashylyǵy komıtetiniń baspasóz qyzmeti.
Balyq qorǵaý aktsııasy kezinde bekire tuqymdas balyqtardy zańsyz tasymaldaǵan, saqtaǵan derekter tirkelgen.
«Máselen, 15 sáýirde Atyraý oblysyndaǵy Janbaı aýylynyń mańynda jalpy salmaǵy 100 keli bekire tuqymdas balyq tasymaldaǵan avtokólik ustaldy. Sol kúni Atyraý qalasynda jergilikti turǵynnan 812 keli 247 dana bekire tuqymdas balyq tárkilendi. Al, 17 sáýirde «Aqjaıyq» memlekettik tabıǵı rezervatynyń aýmaǵyndaǵy tyıym salynǵan jerde balyq aýlaǵan 2 adamdy ustady. Shaǵyn kólemdi kemeni tekserý kezinde 2,2 tonna balyq tabylyp, tárkilendi. Ustalǵan adamdarǵa tıesili sýdan aý (venter) alyndy. Mańǵystaý oblysynyń Fort-Shevchenko qalasynda 26 sáýirde 148,55 keli bekire tuqymdas balyqty zańsyz tasymaldaǵan jergilikti turǵynnyń basqarýyndaǵy avtokólik toqtatyldy», - dep málim etti baspasóz qyzmetinen.
Sondaı-aq, Batys Qazaqstan oblysynda ruqsat qujatsyz balyq tasymaldaǵan 16 kólik júrgizýshisi ustalǵan. Osyndaı is-sharalardyń nátıjesinde 15 tonnaǵa jýyq balyq tárkilenip, 15 qylmystyq is qozǵalǵan.
Aktsııa kezinde bazarlar men mamandandyrylǵan dúkenderdiń sıntetıkalyq monojipten jasalǵan balyq aýlaý quraldaryn zańsyz satýyna monıtorıng jasaldy. Onyń nátıjesinde 29 sáýirde Atyraý qalasyndaǵy saýda bazarlarynyń birinde tyıym salynǵan 79 aýdy satý deregi anyqtalyp, tártip buzýshyǵa QR Ákimshilik quqyqbuzýshylyq týraly kodeksiniń 196-babymen 72,9 myń teńge aıyppul salynǵan.
Eske sala ketelik, budan buryn Atyraý oblysynda qamys arasyna jasyrylǵan úsh júrdek qaıyq tárkilengenin , keıin Kaspıı jaǵasynan brakonerlerdiń «qonysy» tabylǵanyn habarlaǵan edik.