Kaspııde taǵy ıtbalyq qyrylyp, qylmystyq is qozǵaldy

ASTANA. QazAqparat – 6 mamyr kúni Kaspıı teńizi jaǵalaýynan 15 ıtbalyq jáne 4 bekire balyǵynyń óleksesi tabyldy. Oqıǵa boıynsha qylmystyq is qozǵaldy. Bul týraly QazAqparat tilshisi Ekologııa jáne tabıǵı resýrstar mınıstrligi Balyq sharýashylyǵy komıtetiniń baspasóz qyzmetine silteme jasap habarlaıdy.

«6 mamyr kúni jergilikti ýaqyt saǵat 19:00 shamasynda túsken aqparatqa sáıkes, Jaıyq – Kaspıı oblysaralyq basseındik balyq sharýashylyǵy ınspektsııasy men Mańǵystaý oblystyq balyq ınspektsııasy basqarmasynyń memlekettik ınspektorlary monıtorıng júrgizý barysynda Túpqaraǵan aýdany Baýtıno aýyly tusyndaǵy Kaspıı teńizi jaǵalaýynan 15 ıtbalyq pen 4 bekire balyǵynyń óleksesin tapty.

Mańǵystaý oblysy boıynsha Ekologııa departamenti ıtbalyqtar tabylǵan jerden sý men aýa synamalaryn aldy. Tabylǵan teńiz janýarlary ushalarynyń ydyraý deńgeıi joǵarǵy dárejede bolǵandyqtan, oqıǵa sebebin anyqtaý úshin gıstologııalyq synama alý múmkin bolmady», - delingen Balyq sharýashylyǵy komıtetiniń Facebook-paraqshasynda jarııalanǵan habarlamada.

Málim bolǵandaı, atalǵan derek boıynsha qylmystyq is qozǵalǵan. Onyń sheńberinde janýarlardyń ólimine sebep bolǵan mán-jaılar anyqtalady. Balyq sharýalshylyǵy komıteti taratqan aqparatqa saı, ınspektsııa qyzmetkerleri Kaspıı teńiziniń jaǵalaýyna monıtorıng júrgizip jatyr.

Eske sala keteıik, byltyr da Kaspıı teńizinde jappaı ıtbalyq qyrylǵan bolatyn. Ol oqıǵaǵa qatysty zertteý júrgizgen Balyq sharýashylyǵy komıteti qorytyndyny bıyl shyǵardy. Vedomstvo aqparatyna qaraǵanda, ıtbalyqtardyń qyrylýyna pnevmonııa sebep bolǵan.