Kaspııde ıtbalyqtardyń qyrylý sebebi anyqtaldy

ASTANA. QazAqparat – Ótken jyly Kaspıı teńizinde ıtbalyqtardyń jappaı qyrylýyna pnevmonııa sebep bolǵan. Bul jaıynda Ekologııa jáne tabıǵı resýrstar mınıstrliginiń Balyq sharýashylyǵy komıtetinen málim etti, dep habarlaıdy QazAqparat tilshisi.

Vedomstvonyń Facebook-paraqshasynda jarııalanǵan málimetke sáıkes, 2022 jylǵy 7 qarashadan 3 jeltoqsanǵa deıingi kezeńde Mańǵystaý oblysynyń Túpqaraǵan aýdanynda, Kaspıı teńiziniń jaǵalaýynda reıdtik is-sharalar barysynda 172 ıtbalyqtyń ushasy tabylǵan. Osydan keıin komıtet ıtbalyqtardyń ólý sebebin anyqtaý úshin «Gıdrobıologııa jáne ekologııa ınstıtýty» mekemesi, «Mıkrobıologııa jáne vırýsologııa ǵylymı-óndiristik ortalyǵy» JShS, «Qazaqstan qoldanbaly ekologııa agenttigi» JShS, Kaspıı ıtbalyǵyn zertteý jáne ońaltý ortalyǵymen, sondaı-aq Mańǵystaý oblysynyń Ekologııa departamenti, AShM Veterınarııalyq baqylaý jáne qadaǵalaý komıtetiniń aýmaqtyq bólimshelerimen tıisti jumys júrgizdi.

«Ǵylymı uıymdar men quzyretti memlekettik organdardyń ókilderinen turatyn jumys toby saraptama nátıjesi boıynsha 2022 jylǵy qarashada tabylǵan Kaspıı ıtbalyqtarynyń kóptegen daraǵynyń qyrylýynyń negizgi sebebi teńizdiń qazaqstandyq bóliginde janýarlardyń kúzgi shoǵyrlanýy kezeńinde aralas tumaý jáne morbıllıvırýsty ınfektsııanyń órshýi saldarynan vırýspen baılanysty pnevmonııa degen qorytyndyǵa keldi», - dep atap ótedi komıtetten.

Taratylǵan aqparatqa qaraǵanda, teńiz janýarlarynyń ımmýnotoksıkalyq elementtermen jáne qosylystarmen sozylmaly ýlanýy olardyń ımmýnıtetiniń tómendeýine jáne aǵzanyń jalpy tózimdiligine baılanysty juqpaly aýrýlarǵa sezimtaldyǵynyń joǵarylaýyna yqpal etedi.

«Osylaısha, 2022 jyldyń qarashasynda tabylǵan Kaspıı ıtbalyqtarynyń qyrylý sebebi - ımmýnıtettiń álsireýinen týyndaǵan vırýsty ınfektsııalardyń órshýinen paıda bolǵan pnevmonııa. Immýnıtettiń tómendeý sebebiniń biri – janýarlardyń tirshilik etý ortasynyń lastanýy», - delingen taratylǵan aqparatta.

Foto: www.facebook.com/fishcomitteekz