Kaspııde ıtbalyq áli de qyrylyp jatyr
24 qazan men 18 qarasha aralyǵynda Jaıyq-Kaspıı oblysaralyq basseındik balyq sharýashylyǵy ınspektsııasynyń qyzmetkerleri Mańǵystaý oblysynyń Túpqaraǵan aýdanynda Kaspıı teńiziniń jaǵalaýyna monıtorıng júrgizý barysynda jaǵalaýǵa shyǵyp qalǵan 1 155 ıtbalyq óleksesin tapty.
«Mańǵystaý oblysynyń jaǵalaý beldeýin — Qulaly, Teńiz, Podgornyı, Novyı araldaryn, sondaı-aq Qarajanbas pen Qalamqas ken oryndarynyń aýmaǵyn tikushaqpen barlaý barysynda taǵy 834 ıtbalyq ushasy anyqtalǵan. Negizgi 500-den astam bóligi Qulaly aralynan tabylǵan. Osy aralyqta bas-aıaǵy 1989 óli ıtbalyq qańqasyn jınap aldyq», — delingen habarlamada.
Mańǵystaý oblystyq balyq sharýashylyǵy ınspektsııasy basshysynyń mindetin atqarýshy Andreı Rýtskııdiń málimetinshe, ólekseler ábden shirip, ydyrap ketken, sondyqtan patologııalyq materıal alý múmkin bolmaǵan.
«Itbalyqtardyń tini men ishki organynan synama aldyq. PTR ádisimen synama alynyp, qus tumaýy, oba, salmonellez, pasterellez, lısterıoz sekildi juqpaly aýrýlary bar-joǵy tekserildi. Ondaı syrqatqa shaldyqpaǵan bolyp shyqty. Túpqaraǵan aýdanyndaǵy polıgonǵa jetkizilip, sonda joıylyp jatyr. Itbalyq qyrylýynyń sebebi búkil laboratorııalyq zertteý nátıjesi shyqqan soń belgili bolady, ǵylymı uıymdardyń pikirinshe oǵan birneshe aı ketýi múmkin. Búkil eki myń ıtbalyq balyqshylardyń aýyna túsip mert boldy dep aıta almaımyz, arasynda birdi-ekilisi solaı jan tapsyrýy múmkin. Faktorlardyń biri ǵana ol. Bir-eki aptaǵa sozylǵan daýyl kezinde ózge elderdiń jaǵalaýynda ólgen ıtbalyqtardy bizdiń eldiń jaǵalaýyna ákelip tastaǵany kórinip tur», — deıdi Andreı Rýtskıı.
Eske sala ketsek, qarashanyń basynda Kaspıı jaǵalaýynan 500-den astam ıtbalyqtyń óleksesi tabyldy.
Keıin jappaı qyrylǵan ıtbalyqtyń sany 1 myńǵa jýyqtady.
Odan bólek, Mańǵystaýda ıtbalyqtarmen qosa bekire tuqymdas balyqtar men sý qustary da qyrylyp jatqany belgili boldy.
14 qarashada Aýyl sharýashylyǵy mınıstrligi Kaspıı teńizinde qyrylǵan ıtbalyqtardy zertteýge qatysty aldyn ala málimetti jarııalady.