Kaspıı jaǵalaýyndaǵy órt «Aqjaıyq» tabıǵı rezervatyna jaıyldy
Oblystyq tótenshe jaǵdaılar departamentiniń qoǵammen baılanys toby taratqan aqparatqa qaraǵanda, qazir órt aýmaǵy 60 gektarǵa jetken.
«Atyraý qalasyna taıaý ornalasqan Keńózek aýyldyq okrýgine qaraıtyn Tasqala aýylynan Kaspıı teńizine qaraı 40 shaqyrym qashyqta qamys órtenip jatyr. Bul – Kaspıı teńiziniń jaǵalaýy. 20 qyrkúıek, keshki saǵat 18:00-degi jaǵdaı boıynsha, jalyn sharpyǵan jaǵalaý aýmaǵy ulǵaıyp, 60 gektarǵa jetti. Al saǵat 19:40 shamasynda ot «Aqjaıyq» memlekettik tabıǵı rezervatynyń aýmaǵyna ótti. Teńiz jaǵalaýynda jel ońtústik-shyǵystan soǵyp tur. Ekpini – 5-7 metr/sekýnd. Aýa temperatýrasy +30S shamasynda. Órt aýmaǵynda mobıldi jáne radıo baılanystyń joqtyǵy qıyndyq týdyryp otyr», -dep habarlady departamenttiń qoǵammen baılanys tobynan.
Órtti sóndirýge Atyraý oblystyq tótenshe jaǵdaılar departamentinen 31 qyzmetker, 10 tehnıka, 1 sý kóligi, «Aq Jaıyq» memlekettik tabıǵı rezervatynan 20 jumysshy men 5 tehnıka, jergilikti atqarýshy organdardan 3 adam, 3 tehnıka, ózge mekemelerden 15 adam, 2 tehnıka tartylǵan.
«Qazir tótenshe jaǵdaılar departamentinde jedel shtab quryldy. 21 qyrkúıek, tańǵy saǵat 07:00-de qamys órtin áýeden sóndirý jumystaryna «QazAvıaSpas» AQ-nyń MI-8 tikushaǵyn jumyldyrý josparlanyp otyr», -dep málim etti departamentten.
Eske salaıyq, Kaspıı jaǵalaýynda tutanǵan ot bir aptadan beri laýlap jatyr. 20 qyrkúıek kúni órt oshaǵynda qalyp qoıǵan eki órt sóndirýshi evakýatsııalandy.