Kaspıı jaǵalaýyndaǵy qamys órtine tikushaqpen 60 tonnaǵa jýyq sý tógildi
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, búgin, 8 shildede teńiz jaǵalaýyndaǵy qamys órtine aerovızýaldy tekserý júrgizilgen.
«Kaspıı teńiziniń jaǵalaýyna aerovızýaldy tekserý júrgizilgennen keıin qamys órtin sóndirý úshin tikushaqpen sý tógýge sheshim qabyldandy Búgin, 8 shildede jaǵalaýdyń sýly-batpaqty bóligindegi qamys órtiniń aýmaǵy 450 gektarǵa jetti. Jergilikti ýaqytpen saǵat 18.00-ge deıin MI-8 tikushaǵynyń STQ-5 qondyrǵysymen qamys órtine 60 tonnaǵa jýyq sý tógildi. Sonyń nátıjesinde jalyn sharpyǵan aýmaq 40 gektarǵa azaıǵany anyqtaldy», - dep habarlady departamenttiń qoǵammen baılanys toby.
Qazir qamys órtin sóndirýge tótenshe jaǵdaılar departamentinen 38 órt sóndirýshi, 12 tehnıka tartylǵan. Al, «Aqjaıyq» memlekettik tabıǵı rezervatynan 28 qyzmetker 9 tehnıkamen kómekke kelgen.
Eske sala keteıik, buǵan deıin Kaspıı jaǵalaýyndaǵy qamys órti 450 gektarǵa jaıylǵanyn jazǵan bolatynbyz.
Sondaı-aq, qamys órtin sóndirýge Qyzylordadan tikushaq tartylatynyn habarlaǵan edik.
Teńiz jaǵalaýyndaǵy órt oshaqtaryn sóndirý úshin Qyzylorda qalasynan sý tógetin qurylǵysy bar MI-8 tikushaǵyn tartýǵa sheshim qabyldanǵan. Óıtkeni, sýly, batpaqty jerdegi órt oshaǵyna ózge tehnıkalardyń jetýi qıyn. Sondaı-aq, órtti odan ári taratpaý úshin aınalasyndaǵy jerdi jyrtýǵa soqasy bar K-700 traktory tartý josparlanǵan.