Kaspıı jaǵalaýyndaǵy qamys órtine 500 tonna sý tógildi, ot oshaǵy áli byqsyp jatyr

ATYRAÝ. QazAqparat – Atyraý oblysynda Kaspıı jaǵalaýyndaǵy qamys órtine 501 tonna sý tógildi. Áli 2 gektarda qamys byqsyp jatyr, dep habarlaıdy QazAqparat tilshisi.

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, qamys órtine álsin-álsin aerovızýaldy tekserý júrgizilip otyr.

«Aerovızýaldy tekserý júrgizilgennen keıin qamys órtin áýe jáne jerústi tásilimen sóndirýge sheshim qabyldandy. Kaspıı teńiziniń jaǵalaýyndaǵy qamys órti 830 gektar aýmaqty sharpydy. Qazir 2 gektarda qamys áli byqsyp jatyr. Tótenshe jaǵdaılar mınıstrligine «Qazavıaqutqarý» AQ-nyń MI-8 tikushaǵymen 167 ret sý tógildi. Qamys órtine tógilgen sý kólemi shamamen 501 tonnany qurady», -lep habarlady departamenttiń qoǵammen baılanys toby.

Órtti sóndirý jumystary jalǵasyp jatyr. Oǵan oblystyq tótenshe jaǵdaılar departamenti men «Aqjaıyq» memlekettik tbıǵı rezervatynan 85 adam men 14 tehnıka jumyldyryldy.

Eske sala ketelik, Kaspıı jaǵalaýynda 18 gektarda qamys áli byqsyp jatqanyn jazǵan edik.

Kaspıı teńiziniń jaǵalaýyndaǵy qamys 6 shildeden beri janyp jatyr.

Qamys órtin sóndirýge Qyzylordadan tikushaq tartyldy.

Sondaı-aq, buǵan deıin Kaspıı teńiziniń jaǵalaýyndaǵy qamys órtine tikushaqpen 162 tonna sý tógilgenin, qamys órtiniń aýmaǵy 690 gektarǵa jetkenin jazǵan bolatynbyz.

Al 9 shildede Kaspıı jaǵalaýyndaǵy qamys órtiniń aýmaǵy 830 gektar boldy.