Kaspıı jaǵalaýyndaǵy qamys órtin sóndirýge Qyzylordadan tikushaq tartylady

ATYRAÝ. QazAqparat – Kaspıı jaǵalaýyndaǵy qamys órtiniń aýmaǵy 20 gektarǵa jetti. Órtti sóndirýge Qyzylordadan sý tógetin qurylǵysy bar tikushaq tartylady, dep habarlaıdy QazAqparat tilshisi.

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, 7 shildede keshki saǵat 21:00-degi jaǵdaı boıynsha qamys ósimdikteriniń janý aýmaǵy 20 gektardy quraıdy.

«Qamys órtin sóóndirý tańerteńgi saǵat 9:00-de bastaldy. Keshke deıin tótenshe jaǵdaılar departamenti men «Aqjaıyq» memlekettik tabıǵa rezervatynyń 71 qyzmetkeri 15 tehnıka, 2 motopompamen shamamen 5 gektar aýmaqtaǵy qamys órtin sóndirdi. Qamys órtin sóndirýge jaǵalaýdyń sýly-batpaqty bolǵany qıyndyq keltirýde. Sol sebepten, 8 shildede teńiz jaǵalaýyndaǵy órt oshaqtaryn sóndirý úshin Qyzylorda qalasynan sý tógetin qurylǵysy bar MI-8 tikushaǵyn tartý josparlanyp otyr. Órt oshaǵynyń odan ári taraýyn boldyrmaý úshin aınalasyndaǵy jerdi jyrtýǵa soqasy bar K-700 traktory tartylady», -dep habarlady departamenttiń qoǵammen baılanys toby.

Eske sala ketelik, Atyraý oblysynda Kaspıı jaǵalaýynda taǵy qamys órtenip jatqanyn habarlaǵan edik.

Keıin Atyraý oblysynda Kaspıı jaǵalaýyndaǵy 5 gektarda qamys órtiniń 5 oshaǵy anyqtalǵanyn jazǵan bolatynbyz.

Kaspıı teńiziniń jaǵalaýyndaǵy qamys órti 6 shildede keshki saǵat 20:00 shamasynda belgili bolǵan.

Órt Atyraý qalasynyń irgesindegi Keńózek aýyldyq okrýginen 30 shaqyrym qashyqtyqta tutanǵan.

Al, 7 shildede «Qazavıaspas» AQ-nyń MI-8 tikushaǵymen Kaspıı teńiziniń jaǵalaýyndaǵy qamys órtine áýeden barlaý júrgizildi.

Sol kezde shamamen 5 gektardy aýmaqty quraıtyn 5 janý oshaǵy anyqtaldy.