Kaspıı jaǵalaýyndaǵy qamys órti bir aptadan beri sónbeı tur

ATYRAÝ. QazAqparat – Atyraý oblysynda Kaspıı teńiziniń jaǵalaýynda tutanǵan qamys órti bir aptadan beri sónbeı tur. Qazir qamys órtinen eldi mekenderge qaýip turǵan joq, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynan málim etkendeı, teńiz jaǵalaýyndaǵy qamys órti 14 qyrkúıekte saǵat 20:40 shamasynda bastalǵan.

«Búgin 20 qyrkúıekte jergilikti ýaqytpen saǵat 08:57-de qamys órtiniń áli órtenip jatqany tirkeldi. Ot Atyraý qalasynyń mańyndaǵy Keńozek aýyldyq okrýgine qaraıtyn Alǵabas aýylynan Kaspıı teńizine qaraı 40 shaqyrym qashyqtyqta janyp jatyr. Qamys órtinen eldi mekenderge tónip turǵan qaýip te, odan zardap shekkender de joq. Órttiń aýmaǵy anyqtalyp jatyr», -habarlady departamenttiń qoǵammen baılanys toby.

Kaspıı teńiziniń jaǵalaýyndaǵy qamys órtiniń eldi mekenderge taralýyn boldyrmaý úshin Atyraý oblystyq tótenshe jaǵdaılar departamentiniń 25 qyzmetkeri men 6 tehnıkasy jumyldyrylǵan.

Budan buryn Atyraý qalasynan 30 shaqyrym jerde 6 gektar qamys janǵanyn habarlaǵan edik.

Keıin tótenshe jaǵdaılar departamenti qamys órtin sóndirýge teńiz jaǵalaýyndaǵy batpaq kedergi bolyp turǵanyn málim etti .

Budan soń qamys órti 16 gektarǵa jetip , tútinniń ıisi Atyraýda sezildi .