Kaspıı jaǵalaýynda órtengen qamystyń bir oshaǵynda ot sóndirildi

ATYRAÝ. QazAqparat - Tótenshe jaǵdaılar mınıstrligi alapat órtke áýeden barlaý jasady. Qazir shamamen 400 sharshy metr alańda eki jerde qamys ashyq otpen janyp jatsa, 1 ga alańda qamystyń bir oshaǵy byqsyp jatyr, dep habarlaıdy QazAqparat.

Tótenshe jaǵdaılar mınıstrliginiń málimetinshe, órt «Aqjaıyq» memlekettik tabıǵı rezervatynyń aýmaǵyna taralǵan joq.

Sóndirý jumystaryn júrgizgen sátten bastap sý aǵyzý qurylǵysy bar TJM MI-8 tikushaǵy 33 ret jalyn oshaǵyna sý shashty.

«Shamamen aýmaǵy 400 sharshy metr bolatyn qamystyń ashyq otpen janyp jatqan bir oshaǵy sóndirildi. Órt sóndirý boıynsha jumystar jalǵasyp jatyr» delingen habarlamada.

Eske sala keteıik, buǵan deıin Atyraý qalasynan 30 shaqyrym jerde 6 gektar qamys janǵanyn habarlaǵan edik.

Keıin tótenshe jaǵdaılar departamenti qamys órtin sóndirýge teńiz jaǵalaýyndaǵy batpaq kedergi bolyp turǵanyn málim etti.

Budan soń qamys órti 16 gektarǵa jetip, tútinniń ıisi Atyraýda sezildi.

Kaspıı jaǵalaýynda tutanǵan ot bir aptadan beri laýlap jatyr. 20 qyrkúıek kúni órt oshaǵynda qalyp qoıǵan eki órt sóndirýshi evakýatsııalandy.

Keıin Kaspıı jaǵalaýyndaǵy órtti sóndirýge tikushaq tartyldy.