Kaspıı jaǵalaýynda órtengen qamys tútininiń ıisi Atyraýda sezilip tur

ATYRAÝ. QazAqparat –Kaspıı jaǵalaýynda órtengen qamys tútininiń ıisi Atyraý qalasynda sezilip tur. Qamys órti 14 qyrkúıekten beri sóngen joq, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys tobynan málim etkendeı, búgin 18 qyrkúıekte Kaspıı teńiziniń jaǵalaýynda qamys órti áli jalǵasyp jatyr.

«Búgin jergilikti saǵat 12:00-degi jaǵdaı boıynsha Kaspıı teńiziniń jaǵalaýyndaǵy 20 gektar aýmaqta qamys órtenip jatyr. Atap aıtqanda, Atyraý qalasy Keńozek aýyldyq okrýgindegi Alǵabas aýylynan Kaspıı teńizine qaraı 40 shaqyrym qashyqtyqta. Teńiz jaǵalaýynda órtengen aýmaq batpaqty, órt sóndirý tehnıkalarynyń júrýine qolaısyz bolyp tur. Soǵan baılanysty órtti sóndirý múmkin emes», - dep habarlady qoǵammen baılanys toby.

Ońtústik-shyǵystan shamamen 5-7 metr/sekýnd jyldamdyqpen soqqan jeldiń baǵyty Atyraý qalasyna qaraı bolǵandyqtan, shaharda tútinniń ıisi anyq seziledi. Biraq, eldi mekenderge qaýip tónip turǵan joq. Órtten eshkim zardap shekpegen.

Kaspıı teńiziniń jaǵalaýyndaǵy órtti qaraýyldaý úshin Atyraý oblystyq tótenshe jaǵdaılar departamentinen 33 qyzmetker, 7 tehnıka, onyń ishinde 4 ATs, 1 ASA-20, 1 Gazel men 1 TREKOL kóligi tartylǵan. Departamenttiń órt sóndirýshilerine qamys órtiniń eldi mekenderge qaýip tóndirmeýin qadaǵalaý tapsyrylǵan.

Eske sala ketelik, budan buryn Kaspıı jaǵalaýyndaǵy qamys órti 16 gektarǵa jetkenin jazǵan edik.