Kaspıı jaǵalaýynda kefaldiń qyrylýy teńiz sýynyń jelmen jaıylýynan bolǵan

ATYRAÝ. QazAqparat – Atyraý oblysynda Kaspıı jaǵalaýynda qyrylǵan balyq jaıylǵan sýdyń astynda qalǵan. Balyq óleksesi ydyrap ketkendikten, veterınarlyq saraptama jasaý múmkin bolmaı otyr, dep habarlaıdy QazAqparat tilshisi.

Jaıyq-Kaspıı oblysaralyq balyq sharýashylyǵy basseındik ınspektsııasy taratqan aqparatqa sáıkes, Kaspıı teńiziniń jaǵalaýynda qyrylǵan balyq tabylǵan orynǵa arnaıy komssııa barǵan.

«Kefal balyǵy Kaspıı teńiziniń soltústik-shyǵys bóligindegi «Jılaıa kosa» ýchaskesiniń janyndaǵy jaǵalaýdan 4 shaqyrym qashyqtyqta qyrylǵany anyqtaldy. Keshe, 2 qyrkúıekte atalǵan ýchaskege ınspektsııa basshysy, jergilikti atqarýshy organ, oblystyq ekologııa departamenti, «Balyq sharýashylyǵy ǵylymı óndiristik ortalyǵy», Jylyoı aýdandyq veterınarııa qyzmeti, «Balyq sharýashylyqtardyń qaýymdastyǵy - VD» qoǵamdyq uıym ókilderinen quralǵan jumys toby bardy. Jumys toby balyqtardyń qyrylý sebebin anyqtaý jumystaryn júrgizdi. Ólgen balyqtar tabylǵan oıpatty jerge 9 shaqyrym aýmaǵynda teńizden sý kelgeni belgili boldy. Kefal balyqtarynyń qyrylǵan orny tolyqtaı sý astynda qalǵan. Jaıylǵan sýdyń ortasha tereńdigi – 20 sm. Qyrylǵan kefal balyqtarynyń sý astynda jatqan ornynyń uzyndyǵy – 300, eni 150 metr shamasynda», - dep habarlady atalǵan ınspektsııadan.

Jumys tobynyń quramyndaǵy oblystyq ekologııa departamentiniń ókili sýdan, sý astyndaǵy topyraqtan synamalar aldy. Mundaı synamalar salystyrý maqsatynda balyqtar tabylǵan orynnan 1 shaqyrym qashyqtyqtaǵy jerden de alyndy. Kefal balyǵynyń ólekseleri ydyrap ketken. Soǵan baılanysty óleksege veterınarlyq saraptama jasaý múmkin emes.

«Jumys toby músheleri sońǵy kezde Kaspıı teńiziniń sý deńgeıi kúrt tómendegen degen uıǵarym jasady. Teńizdiń soltústik-shyǵys bóligi – qýma jeldiń jıi soǵatyn bóligi. Ońtústikten jel soqqanda jaǵalaýdaǵy oıpat jerlerge teńiz sýy jaıylady. Al, shyǵystaǵy qurlyqtan soqqan jeldiń áserinen sý deńgeıi kúrt tómendeıdi. Sol sebepten, teńiz sýy jaǵalaýdan birneshe shaqyrymǵa qashyqtap, batpaqqa aınalady. Qýma jeldiń saldarynan «Jılaıa kosa» aýmaǵyndaǵy oıpat jerlerge sýmen birge kefal balyqtary júzip kelgen. Jel baǵyty jedel ózgergerip, sý deńgeıi kúrt tómendegende oıpat jerlerdegi balyq keri shyǵa almaı, qyrylyp qalǵan», - dep málim etti ınspektsııadan.

Jumys tobynyń qorytyndy tujyrymdamasy saraptama nátıjesinen keıin belgili bolady.

Eske sala ketelik, buǵan deıin Atyraý oblysynda Kaspıı jaǵalaýynan balyqtyń qyrylǵan orny tabylǵanyn jazǵan edik.