Kaspıı jaǵalaýynda 18 gektarda qamys áli byqsyp jatyr
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, qamys órtine álsin-álsin aerovızýaldy tekserý júrgizilgen.
«Aerovızýaldy tekserý júrgizilgennen keıin órtti áýe jáne jerústi tásilimen sóndirýge sheshim qabyldandy. Sonyń nátıjesinde órt sharpyǵan qamystyń aýmaǵy 18 gektarǵa deıin azaıdy. Qazir atalǵan aýmaqta qamys byqsyp jatyr. «Qazavıaqutqarý» AQ-nyń MI-8 tikushaǵymen órtengen qamysqa 106 ret sý tógý jumysy júzege asyryldy. Tógilgen sýdyń jalpy kólemi shamamen 300 tonnany quraıdy», -dep habarlady departamenttiń qoǵammen baılanys toby.
Qamys órtin sóndirý áli jalǵasyp jatyr. Jalyndy aýyzdyqtaýǵa Atyraý oblystyq tótenshe jaǵdaılar departamenti men «Aqjaıyq» memlekettik tabıǵı rezervatynan 100-ge jýyq adam, 20-dan astam tehnıka jumyldyryldy.
Eske sala ketelik, Kaspıı teńiziniń jaǵalaýyndaǵy qamys 6 shildeden beri janyp jatyr.
Qamys órtin sóndirýge Qyzylordadan tikushaq tartyldy.
Sondaı-aq, buǵan deıin Kaspıı teńiziniń jaǵalaýyndaǵy qamys órtine tikushaqpen 162 tonna sý tógilgenin, qamys órtiniń aýmaǵy 690 gektarǵa jetkenin jazǵan bolatynbyz.
Al, búgin Kaspıı jaǵalaýyndaǵy qamys órtiniń aýmaǵy 830 gektarǵa jetti.
Atyraý oblysy ákimdigi baspasóz qyzmetiniń málimetinshe, bıyl «Aqjaıyq» memlekettik tabıǵı rezervatyna arnaıy tehnıka satyp alýǵa respýblıkalyq bıýdjetten 285 mln teńge bólingen.
Al, Atyraý oblysynyń tótenshe jaǵdaılar departamentine 30 negizgi jáne arnaıy tehnıka satyp alý úshin jergilikti bıýdjetten 1, 5 mlrd teńge qaralǵan.