Kaspıı jaǵalaýyndaǵy qamys órtin sóndirýge tikushaqpen 30 tonna sý tógildi
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, keshe, 7 qazanda túsqaıta jergilikti órt sóndirýshiler jaǵalaýda janǵan qamys órtin sóndirýdi bastalǵan.
«Keshe, 7 qazanda áýeden aerovızýaldy barlaý júrgizý kezinde Qurmanǵazy aýdanynan 43 shaqyrym qashyqtyqta 5 gektar, osy aýdan aýmaǵyndaǵy «Qara pishen» ýchaskesi tusynda 3 gektar aýmaqta qamystyń janyp jatqany anyqtaldy. Saǵat 17:00-de «Qazavıaqutqarý» AQ-nyń MI-8 tikushaǵynyń sý tógý qurylǵysymen órt oshaqtaryna 30 tonnadan astam sý tógildi», -dep habarlady departamenttiń qoǵammen baılanys toby.
Qamys órtin sóndirý úshin órt sóndirý bólimderinen qosymsha 24 qyzmetker, 1 tikushaq, jol talǵamaıtyn 1 TREKOL kóligi tartylǵan.
Órt sóndirýshiler keshe teńiz jaǵalaýyndaǵy 0,5 gektar aýmaqtaǵy qamys órtin tikushaqpen, motopompalarmen sý shashyp, sapalaqpen urǵylap, kúrepen topyraq shashyp sóndirgen. Al, túngi órttiń eldi mekenge qaýip tóndirmeýi úshin kezekshilik uıymdastyrylǵan.
«Búgin 8 qazanda qamys órtin sóndirý jumysy qaıta jalǵasty. Oǵan tótenshe jaǵdaılar departamentinen 25 qyzmetker tartyldy. Onyń ishinde 15 qyzmetker «Kazavıaqutqarý» AQ-nyń MI-8 tikushaǵymen, 10 qyzmetkeri TREKOL avtokóligimen oqıǵa ornyna jetkizildi. Qyzmetkerler motopompamen, sapalaqpen jáne kúrekpen jalyndy sóndirýge kiristi», -dep málim etti departamenttiń qoǵammen baılanys tobynan.
Kaspıı teńiziniń jaǵalaýyndaǵy qamys órtinen eldi mekenderge qaýip tónip turǵan joq. Oblys aýmaǵyndaǵy qamys órti baqylaýǵa alynǵan.
Eske sala ketelik, keshe Kaspıı teńiziniń jaǵalaýyndaǵy 5 gektar aýmaqta qamys órtenip jatqanyn habarlaǵan bolatynbyz.