Kaspıı teńiziniń jaǵalaýynda 700 gektar qamys órtendi

<p>ATYRAÝ. KAZINFORM &ndash; Kaspıı teńiziniń Atyraý men Reseıdiń Astrahan oblysy shekarasyndaǵy jaǵalaýynda tutanǵan qamys órti 700 gektar aýmaqty sharpydy.&nbsp;</p>

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, 2 naýryzda qamys órti Kaspıı teńiziniń Qurmanǵazy aýdany aýmaǵyndaǵy jaǵalaýynda tutanǵan. Al, bul aýdan Reseı Federatsııasynyń Astrahan oblysymen shektesedi.

«Aýdan ortalyǵy – Qurmanǵazy aýylynan 40 shaqyrym qashyqtyqta «Qurmanǵazy ormanshylyǵy» KMM aýmaǵyndaǵy teńiz jaǵalaýynda qamys órtendi. Jalyn sharpyǵan aýmaq – 700 gektar. Búgin, 4 naýryzda saǵat 10.00-de órtengen aýmaqqa barlaý júrgizý úshin «QazAvıaQutqarý» AQ-nyń MI-8 tikushaǵy áýege kóterildi. Órtti sóndirýge Qurmanǵazy aýdanyndaǵy №7 órt sóndirý bóliminen 12 qutqarýshy, 1 motopompa, jol talǵamaıtyn 1 TREKOL kóligi tartyldy», - dep habarlady departamenttiń qoǵammen baılanys toby. 

Buǵan qosymsha «Qurmanǵazy Orman sharýashylyǵy» KMM-dan 25 adam, 4 motopompa, 5 motorly qaıyq jumyldyrylǵan. 

«Kaspıı teńiziniń jaǵalaýyndaǵy qamys órtin sóndirý jalǵasyp jatyr. Jalyn jaǵalaýdyń sýly-batpaqty aýmaǵyn sharpyǵan. Oǵan kólikpen baratyndaı jol joq. Bul órtti sóndirýge qıyndyq týdyryp otyr», - dep málim etti departamenttiń qoǵammen baılanys tobynan.

Eske sala ketelik, budan buryn Kaspıı teńiziniń Reseımen shekaradaǵy jaǵalaýynda qamys órtenip jatqanyn jazǵan edik.