Kaspıı teńiziniń Reseımen shekaradaǵy jaǵalaýynda qamys órtenip jatyr

<p>ATYRAÝ. KAZINFORM &ndash; Atyraý oblysynda Kaspıı teńiziniń jaǵalaýynda 100 gektar aýmaqta qamys órtendi. Jalyn Reseımen shakaradaǵy Qurmanǵazy aýdanynda tutanǵan.</p>

Atyraý oblysy ákiminiń orynbasary Jasulan Bısembıevtiń málimetinshe, qamys órti 2 naýryz kúni saǵat 15:45-te tutanǵan.

«Qurmanǵazy aýdanyndaǵy Qurmanǵazy aýylynan 40 shaqyrym qashyqtyqta Kaspıı teńiziniń jaǵalaýynda tutanǵan qamys órti 100 gektar batpaqty aýmaqty sharpyǵany anyqtaldy. Qamys órtinen Qurmanǵazy aýdanyndaǵy eldi mekenderge tónip turǵan qaýip joq. Keshe órtti sóndirýge saǵat 17:57-de Qurmanǵazy aýdanynyń №7 órt sóndirý bóliminen, orman sharýashylyǵy men jergilikti atqarýshy organnan 36 adam, 5 motopompa, 1 tehnıka, 4 motoqaıyq tartyldy», - dep habarlady Jasulan Bısembıev.

Onyń aıtýynsha, oblys ákiminiń tapsyrmasyna sáıkes jaqyn arada órt oshaǵyna Atyraý qalasynan tikushaq pen órt sóndirýshilerdi jiberý josparlanyp otyr.

Eske sala ketelik, budan buryn Atyraýda byltyrǵy qazannan beri turǵyn úıdegi órtten 6 qaza tapqanyn habarlaǵan edik.